حكومەتی عێراق دەیەوێت كامپی ئاوارەكان لەهەرێمی كوردستان دابخات و پارتی ڕێگرە
وێنەی کەمپێکی ئاوارەکان
SNN-عەلی حەمە سەعید
لەگەڵ ئەوەی لە ئیستادا هیچ مەترسییەكی ئەوتۆ نەماوە لەسەر ئەو ئاوارانەی كە بەهۆی هێرشەكانی داعش ڕوویان لە هەرێمی كوردستان كردبوو لە چەند كامپێك نیشتەجێبوون، بەڵام لە ئێستادا حكومەتی عێراق بەنایازی داخستنی سەرجەم ئەو كامپانەیە و پارتی ڕێگری دەكات لە داخستنیان و ڕێگە نادات ئاوارەكانی شەنگال بگەڕێنەوە سەرماڵ و حاڵی خۆیان.
بەگوێرەی ئەو زانیارییانەی كە لە لیژنەی كۆچ و كۆچبەرانی عیراقی بە SNN دراون ئەوە خراوەتەڕوو، حكومەتی عێراقی لە كابینەی پێشوو چەندین جار هەوڵیدا بوو كە سەرجەم كامپی ئاوارەكانی پارێزگاكانی دیكەی عێراق لە هەرێمی كوردستان دابخات و ئاوارەكان بگەڕێنێتەوە بۆ سەر ماڵ و حاڵی خۆیان و قەرەبوشیان بكاتەوە، بەڵام پارتی ڕٍێگربووە لەو هەوڵەی حكومەتی عێراقی ئەوەش لە پێناو ئەوەی بابەتی بوونی كامپی ئەو ئاوارانە لەهەرێمی كوردستان وەك كارتێكی سیاسی لەبەرامبەر حكومەتی عێراق بەكار بهێنێت و هەروەها لەسەردانی بەرپرسانی بیانی وانیشان بدات هەرێمی كوردستان باوەشی بۆ ئاوارەكان كردووەتەوە.
ئاماژەی بەوەشكرد، لە ئێستادا جارێكی دیكە حكومەتی نوێی عێراق بەرپرسانی هەرێمیان ئاگاداركردووەتەوە كە بە نیازی داخستنی سەرجەم كامپی ئاوارەكانن لە هەرێمی كوردستان كە ژمارەیان 37 كامپە، بەڵام جارێكی دیكە پارتی ڕێگرە و نایەوێت ئەو كامپانە دابخرێن، بەتایبەت كامپی مەخمور و ئەو كامپانەی دیكە كە ئاوارە ئێزدییەكانی تێدایە و ڕێگە نادات بگەڕێنەوە بۆ شەنگال.
SNN ئەوەشی زانیوە كە حكومەتی عێراقی بەرپرسانی هەرێمیان ئاگادار كردووەتەوە كە ئەگەر ئاسانكاری نەكەن بۆ گەڕانەوەی ئاوارەكان و داخستنی تەواوەتی ئەو كامپانە، ئەوا لەمەودوا هیچ جۆرە هاوكارییەكی دانیشتووانی ناو كامپەكان ناكات و دەبێت حكومەتی هەرێم خۆی سەرجەم بەرپرسیارێتی دابینكردنی پێداویستیەكانی دانیشتووانی كامپەكان لە ئەستۆ بگرێت و نابێت ڕێگریش بكات لەهەر ئاوارەیەكی دانیشتووی ئەو كامپانەی كە بەنایزی گەڕانەوەن بۆ جێگەوماڵ و حاڵی خۆیان.
