کۆمپانيايەکی نەوتی کارەکانی لە هەرێم راگرت

SNN

کۆمپانیای DNOی نەرویجی بەرهەمهێنانی نەوتی لە هەرێمی کورستان راگرت و رايگەياند: دوای چوار رۆژ لە راوەستانی هەناردەکردنی نەوت بە ناچاری دەستمان بە داخستنی بيرە نەوتەکان کرد، دەشڵێت “ئێمە بەردەوامبووەن لە بەرهەمهێنانی نەوت بەڵام توانای کۆگاکردنمان سنووردارە”.

کۆمپانيای DNO پێش داخستنی، رۆژانە 107 هەزار بەرمیل نەوتی لە کێڵگە نەوتییەکانی هەرێمی کوردستان بەرهەمدەهێنا، لە دوو رۆژی رابردوودا بەهۆی راوەستانی هەناردەکردنی نەوت، لە ئۆسلۆ نزیکەی  %12پشکەکانی لەدەستدا.

ئەمەش لە کاتێکدایە رۆژی 25ی ئەم مانگە، وەزارەتی نەوتی عێراق رایگەیاند، دۆسیەی هەناردەی نەوتی هەرێم بۆ تورکیا، لەلایەن دادگای نێودەوڵەتی لە پاریسی پایتەختی فەرەنسا یەکلایی کراوەتەوە و کۆماری عێراق براوەیە و دادگای پاریس بە فەرمی رایگەیاند: تورکیا پێشێلکاری لە رێکەوتننامەی هێڵی بۆرییە نەوتەکانی عێراق کردووە.

دواتر نوسینگەی گواستنەوەی نەوتی عێراقی نووسراوێکی ئاڕاستەی بەندەری جەیهان کرد بۆ راگرتنی هەناردەی نەوتی هەرێم و تورکیاش بە بڕیارەکانی دادگای پاریس پابەندبوو.

لەو بارەیەوە حکومەتی هەرێم رایگەیاند: بریاری دادگای فەرەنسی لە بەرژەوەندی حکومەتی عێراق دژی تورکیا، رێگر نابێت لە پەیوەندیەکانی نێوان هەرێم لەگەڵ حکومەتی بەغدا. وتیشی، “سەردانی بەغدا دەکەینەوە بۆ گفتوگۆ و چارەسەرکردنی بابەتەکانی پەیوەندیدار بەو پرسە”.