پارە دابینكراو ئەمڕۆ مووچەی لیوا هاوبەشەكان دابەشدەكرێت

SNN-عەلی حەمە سەعید

لەگەڵ ئەوەی وابڕیاربوو دوێنێ‌ سێ‌ شەممە دەستبكرێت بە دابەشكردنی مووچەی لیواهاوبەشەكانی سەر بە وەزارەتی پێشمەرگە، بەڵام بەهۆی دابیننەكردنی پارە لە لایەن هاوپەیمانانەوە دابەشكردنی مووچەكانیان بۆ ڕۆژی پێنج شەممە دواخرا، بەڵام ئەمڕۆ پارەكەیان بۆ دابینكراو دەستدەكرێت بەدابەشكردنی مووچە، هاوكات تا ئێستا وادەی دابەشكردنی مووچەی مانگی نیسان دیارینەكراوە و 400 ملیارەكەی بەغدا ڕەوانەكراوە.

بەگوێرەی ئەو زانیاریانەی كە لەبەرپرسێكی وەزارەتی دارایی بە SNNدراون ئەوەخراوەتەڕوو،ئەمڕۆ لەلایەن هێزەكانی هاوپەیمانان و وەزارەتی دارایی بڕی پارەی پێویست بۆ مووچەی هێزی لیواهاوبەشەكانی سەر بەوەزارەتی پێشمەرگە دابینكراو و ئەفەسەرو كارمەندانی ئەو هێزانە دەتوانن ئەمڕۆ چوار شەممە سەردانی بانكەكان بكەن بۆ وەگرتنی مووچەكانیان، ئەوەش دوای ئەوەی وابڕیاربوو كە دوێنێ‌ مووچەیان پێبدرێت و دواتر دواخرا بۆ پێنج شەممە.

ئاماژەی بەوەشكرد، تا ئێستا هیچ وادەیەك دیاری نەكراوە بۆ دەستكردن بە دابەشكردنی مووچەی مانگی نیسانی فەرمانبەرانی هەرێم چونكە تا ئێستا 400 ملیار دینارەكە نەگەیشتووەتە هەرێم و هەروەها داهاتی ناوخۆش وەك پێویست كۆنەكراوەتەوە و ئەوەی لەبەردەستدایە بەشی لە %30ی مووچە ناكات و لەئێستادا لەهەموو كات زیاتر وەزارەتی دارایی لەخراپترین دۆخی دارایدایە.

ئەو بەرپرسەی وەزارەتی دارایی ئەوەشی خستەڕوو، پرسی دابینكردنی مووچەی فەرمانبەرانی هەرێم لەلایەن بەغداوە تا ئیستا هەر قسەیەو هیچ هەنگاوێكی كردەیی نەنراوە بۆ ئەو بابەتە، بۆیە تا ئەوكاتەی بودجەی گشتی پەسەند دەكرێت دابەشكردنی مووچە لە هەرێمی كوردستان ڕووبەوڕووی گرفت دەبێتەوە.