دوای پلە بەرزکردنەوەیان مووچەی ئەفسەرانی پێشمەرگە نزیکەی 50 تا 200 هەزار زیاد دەكات

عەلی حەمەسەعید-SNN

وەزارەتی پێشمەرگە سەرقاڵی ئامادەكردنی خشتەی سێ ساڵی پلەبەرزكردەنەوەی ئەفسەرانی وەزارەتی پێشمەرگەیە، دوای پلە بەرزکردنەوەشیان مووچەی بەشێک لەو ئەفسەرانە نزیكەی 50 تا 200 هەزار زیاد دەكات، بەڵام پلە بەرزکردنەوەکە یەكەكانی 70 و 80 ناگرێتەوە.

بەگوێرەی ئەو زانیارییانەی كە لەبەرپرسێكی پەیوەندیدار بە هێزەكانی پێشمەرگە بە SNNدراون ئەوەخراوەتەڕوو، لیستی خشتەی پلەبەرزكردنەوەی ئەفسەرانی سەر بە وەزارەتی پێشمەرگە بۆ ئەنجومەنی وەزیران نێردراوە و بەم نزیكانە دەگەڕێتەوە و فەرمانی بۆ دەردەچێت، هاوكات ئەو لیستە پلەبەرزكردنەوە زیاتر لە هەزار ئەفسەری وەزارەتی پێشمەرگەی تێدایە.

ئەو خشتەیەی ئامادەکراوە، برییتییە لە خشتەی پلەبەرزكردنەوەی سێ‌ ساڵی ڕابردووی ئەفسەرانی هێزەكانی پێشمەرگە و چاوەڕێدەكرێت ئەم مانگە لەلایەن ئەنجومەنی وەزیرانی فەرمانیان بۆ دەربكرێت و پاشان ناوەكان ئاراستەی وەزارەتی دارایی بكرێت كە بەهۆیەوە هەندێك لەو ئەفسەرانە لە 50 هەزارەوە بۆ نزیكی 200 هەزار دینار لە مووچەكانیان زیاد دەبێت.

هەروەها بەگوێرەی راگەیەندراوێکی وەزارەتی پێشمەرگە، پلەبەرزكردنەوەی ئەو ئەفسەرانەی هێزی پێشمەرگە ئەفسەرانی یەكەكانی 70 و 80 ناگرێتەوە ئەوەش بەهۆی ئەوەی لەلایەن وەزارەتی پێشمەرگەوە لێكۆڵینەوە و وردبینی لە لیستی ئەفسەرانی ئەو هێزانە دەكرێت و دوای تەواوبوونی وردبینی ئەوانیش پلەكانیان بەرزدەكرێتەوە.