گه‌شته‌كانى هێڵى ئاسمانى عێراقى بۆ ئه‌ڵمانیا به‌ته‌واوه‌تى راگیران
فڕۆكه‌یه‌كى هێڵى ئاسمانى عێراقى | فۆتۆ: Wathiq Khuzaie/Getty Images
SNN
ئه‌مڕۆ هه‌ینى 5ى نیسان، گه‌شته‌كانى هێڵى ئاسمانى عێراقى بۆ ئه‌ڵمانیا به‌ته‌واوه‌تى راگیران، به‌هۆى هه‌ڵوه‌شانه‌وه‌ى گرێبه‌ستى ئه‌و كۆمپانیایه‌ى كه گه‌شتیارانى عێراق له‌برى هێڵى ئاسمانى عێراق ده‌برد بۆ ئه‌وروپا.
به‌پێى زانیارییه‌كان، “له ساڵى 2016ه‌وه به‌هۆى ئه‌وه‌ى هێڵى ئاسمانى عێراقى مه‌رجه‌كانى سه‌لامه‌تى و ته‌ندروستى ئاژانسى ئاسمانى ئه‌وروپاى جێبه‌جێ نه‌كردووه ته‌واوى گرێبه‌سته‌كانى بۆ رێكخستنى گه‌شت به فڕۆكه‌ى خۆى بۆ ئه‌وروپا هه‌ڵوه‌شاونه‌ته‌وه، له‌به‌ر ئه‌وه په‌ناى بردووه‌ته‌به‌ر به‌ركاهێنانى فڕۆكه‌ى كۆمپانیایه‌كى چیكى بۆ ئه‌وه‌ى بتوانێت گه‌شته‌كانى ئه‌نجام بدات، به‌ڵام ئه‌مڕۆ گرێبه‌ستى ئه‌و كۆمپانیایه‌ش هه‌ڵوه‌شاوه‌ته‌وه”.
له ئه‌نجامى هه‌ڵوه‌شانه‌وه‌ى گرێبه‌سته‌كه، ئه‌مڕۆ به‌ته‌واوه‌تى گه‌شته‌كانى هێڵى ئاسمانى عێراقى بۆ ئه‌ڵمانیا راگیران و تاوه‌كو ئێستا دیار نییه كه كه‌ى ده‌ستپێده‌كه‌نه‌وه، به‌هۆى ئه‌وه‌ى نه هێڵى ئاسمانى عێراقى مافى رێكخستنى گه‌شتى هه‌یه، نه هیچ كۆمپانیایه‌كى تایبه‌تیش هه‌یه كه فڕۆكه‌كانى بداته هێڵى ئاسمانى عێراقى.
به‌پێى زانیارییه‌كان، ئه‌مڕۆ به‌هۆى ئه‌م كێشه‌یه‌وه گه‌شتێكى هێڵى ئاسمانى عێراقى كه بڕیابووه له به‌غداوه بۆ هه‌ولێر و له هه‌ولێره‌وه بۆ فرانكفۆرت ئه‌نجام بدرێت هه‌ڵوه‌شاوه‌ته‌وه.
