” ڕاگرتنی فرۆشتنی نەوتی هەرێم پەیوەندی بە هەرێم و عێراقەوە نەماوە و تەنها توركیا ڕیگرە “

SNN-عەلی حەمە سەعید

لەگەڵ ئەوەی وابڕیاربوو رۆژی شەممە دەستبكرێتەوە بە هەناردەكردن و فرۆشتنی نەوتی هەرێم لەڕێگەی بری نەوتی جەیهانی توركیاوە، بەڵام ئەمڕۆش نەوتەكەی هەرێم ڕەوانە نەكرا، سەرۆكی فراكسیۆنی یەكێتی لە پەرلەمانی عێراق ئاماژە بەوەدەكات ئەو بابەتە لەنێوان هەردوو حكومەتی عێراق و هەرێم یەكلایی بووەتەوە و ئەوەی تا ئێستا ئامادە نییە ڕێككەوتنەكەی هەرێم و بەغدا بخاتە بواری جێبەجێكردنەوە توركیایە.

هەرێم كەمال ئاغا، سەرۆكی فراكسیۆنی یەكێتی لە ئەنجومەنی نوێنەرانی عێراق بە SNNی ڕلگەیاند: تا ئێستا دیار نییە كەی دەستدەكرێتەوە بە هەناردەكردن و فرۆشتنی نەوتی هەرێم بۆ بازاڕەكانی جیهان، ئەوەش بەهۆی ئەوەی تا ئێستا توركیا وەڵامی حكومەتی عێراقی نەداوەتەوە بە دەستكردنەوە بە هەناردەكردنی نەوتی هەرێمی كوردستان، لەكاتێكدا هەردوو حكومەتی هەرێم و بەغدا ڕێككەوتوون كە نەوتی هەرێم لەژێر چاودێری كۆمپانیای سۆمۆ بە بازاڕبكرێت.

ئاماژەی بەوەشكرد، هۆكاری سیاسی و هونەری لەپشت بەردەوامیدانە بە هۆكاری ڕاگرتنی نەوتی هەرێم، چونكە ئێستا عێراق رەزامەندیداوە بە دەستكردنەوە بە فرۆشتنی نەوتی هەرێم بەڵام توركیا رێگریدەكات و بیانوەكەشی پاككردنەوەی بۆری نەوت و پشكنینی بۆریە نەوتیەكانە

سەرۆكی فراكسیۆنی یەكێتی لە پەرلەمانی عێراق ئەوەشی خستەڕوو، باشترین چارەسەری بنەڕەتی بۆ كێشەی نەوت لەنێوان هەرێمی كوردستان و عێراق، دەرچوونی یاسای نەوت و غازەو ئەوەش دوای پەسەندكردنی پرۆژەیاسای بوودجە دەبێت هاوكات تا ئێستا گفتوگۆكردن لەبارەی بڕگەو مادەكانی پڕۆژە یاسای بودجە بەردەوامی هەیە لەگەڵ ئەوەشدا وەزارەتی دارایی عێراقە زۆرینەی داهاتی بوودجەی لەسەر داهاتی نەوت داناوە ئەوەش لەكاتی دابەزینی نرخی نەوت، زیان بە بوودجە دەگات و ناتواندرێت وەك خۆی جێبەجێبكرێت.