ئەنجامی تاقیکردنەوەکانی ماستەر و دکتۆرا رادەگەیەندرێت

‏SNN
وەزارەتی خوێندنی باڵا و توێژینەوەی زانستی حکومەتی هەرێم رایگەیاند: لە چەند رۆژى داهاتوو ئەنجامە بەراییەکانى ماستەرو دکتۆرا ڕادەگەیەنرێت.

وەزارەتی خوێندنی باڵا راشیگەیاند: بەسەرپەرشتى ڕاستەوخۆى د. ئارام محمد قادر وەزیرى خوێندنى باڵا و توێژینەوەى زانستى، کارکردن لەسەر پڕۆسەى خاڵبەندى پێشبرکێی وەرگرتن و پرۆسەی وردبینی خوێندنى باڵا/ دبلۆمی باڵا و ماستەر و دکتۆرا لە دیوانى وەزارەت بەردەوامەو وابڕیارە لە داهاتوییەکى نزیکدا ئەنجامە بەراییەکان ڕابگەیەنرێت.

ئاماژەی بەوەشکرد: دوای ئەنجامدانی تاقیکردنەوەی توانستی زانستی خوێندنی باڵا/دبلۆمی باڵا و ماستەر و دکتۆرا لە زانکۆ حکومیەکانی ھەرێمی کوردستان بۆ ساڵی خوێندنی ٢٠٢٣-٢٠٢٤ بە شێوەیەکی سەرکەوتوانە، پرۆسەی ھەڵەچنینی پەراوی تاقیکردنەوە تەواو بوە و لە ئێستادا بەسەرپەرشتى ڕاستەوخۆى وەزیرى خوێندنى باڵا و توێژینەوەى زانستى پڕۆسەى خاڵبەندى و ڕێکخستنی پێشبرکێی وەرگرتن لە نێوان پێشکەشکاران و پرۆسەی وردبینی دەستی پێکردوە و بەردەوامە، پێشبینی دەکرێت لە چەند رۆژى نزیکى داهاتوو ئەنجامە بەراییەکان رابگەیەنرێت.

باسی لەوەشکرد: بە ھۆی فراوانی پرۆسەی خوێندنی باڵا کە تیایدا ١٥٧٢٨ خوازیار داواکارى پێشکەش کردوە، بۆیە وەزارەت جەختدەکاتەوە لەسەر جێبەجێکردنى پرەنسیپى دادپەروەرى و شەفافیەت و هەلى یەکسان لە پرۆسەکەداو ھەموو ھەوڵێکیش دراوە کە پڕۆسەى خاڵبەندى و ڕێکخستنی پێشبرکێی وەرگرتن لە نێوان پێشکەشکاران و پرۆسەی وردبینی بە شێوەیەکی سەرکەوتووانە ئەنجام بدرێت تاوەکو بنەماکانی شەفافیەت و دادپەروەری و ھەلی یەکسان بەتەواوەتى بەرجەستە بێت.