دوای 35 ساڵ بەسەر تاوانی ئەنفال تا ئێستا حكومەتی عێراق قەرەبووی كەسوكاری ئەنفالكراوانی نەكردووەتەوە
SNN-عەلی حەمەسەعید
ئەندامێكی ئەنجومەنی نوێنەرانی عێراق لە فراكسیۆنی یەكێتی ئاماژەبەوەدەكات دوای تێپەربوونی 35 ساڵ بەسەر تاوانی ئەنفال و هەروەها تیپەڕبوونی 16 ساڵ بەسەر بڕیاری دادگای باڵای تاوانەكانی عێراق بۆ بە جینۆسایدناساندنی تاوانی ئەنفال بەڵام تا ئێستا حكومەتی عیراق نەیتوانیوە قەرەبووی خانەوادەی ئەنفالكراوان بكاتەوە، هاوكات لە یاسای بودجەی گشتی عیراق هیچ بڕە پارەیەك وەك قەرەبوو بۆ كەسوكاری ئەنفالكراوان تەرخاننەكراوە.
كەریم شوكور، ئەندامی ئەنجومەنی نوێنەرانی عیراق لە فراكسیۆنی یەكێتی بەSNNی ڕاگەیاند: دوای تێپەڕبوونی 16 ساڵ بەسەر بە جینۆساید ناساندنی تاوانی ئەنفال لەلایەن دادگای باڵای تاوانەكانی عیراق و هەروەها تێپەربوونی 35 ساڵ بەسەر ئەنجامدانی ئەو تاوانە لەلایەن ڕژێمی لەناوچووی بەعسەوە بەداخەوە تا ئێستا نەتوانراوە قەرەبووی خانەوادەكانیان بكرێتەوە، لەگەڵ ئەوەشدا لە پرۆژە یاسای بودجەی گشتی عیراقدا هیچ بڕگەو ماددەیەك بۆ ئەو قەرەبووە نییە.
ئاماژەی بەوەشكرد، ئەگەر كورد لەبەغدا لەسەر پرسە نیشتمانییەكان یەك دەنگ بێت بەتایبەت پرسێكی وەك ئەنفال، لەگەڵ ئەوەی هیچ بڕگەو ماددەیەك لە پرۆژە یاسای بودجە بۆ قەرەبووی خانەوادەی ئەنفالكراوان جێگیر نەكراوە، بەڵام دەتوانرێت پارەی پێویست بۆ دەستەی شەهیدانی عیراق زیاد بكرێت و لەو رێگەیەوە قەرەبووی خانەوادەی ئەنفالكراوانیش بكرێتەوە، چونكە بەپێی یاسا حكومەتی عیراقی پابەندكراوە بە قەرەبووكردنەوەی كەسوكاری ئەنفالكراوان.
ئەو ئەندامەی پەرلەمانی عێراق لە فراكسیۆنی یەكێتی ئەوەشی خستەڕوو، تائێستا چەندین جار بە ڕەسمی داوای ئەو قەرەبووە كراوە بەڵام هێشتا حكومەتی عیراق نەچوەتە ژێر باری ئەو قەرەبوەوە وەكوو هەموو پرسەكانی نێوان هەرێم و بەغدا پرسی قەرەبووی خانەوادەی ئەنفالكراوانیش بەهەڵواسراوی ماوەتەوە، ئەمەش لەكاتێكدایە بەڕەسمی لەلایەن دادگای باڵای تاوانەكانی عیراقەوە ئەو تاوانە بە جینۆساید ناسێنراوەو حكومەتی عیراق پابەند كراوە بە قەرەبوكردنەوەی كەسوكاری ئەنفالكراوان.
