لەم مانگەوە حكومەتی عێراق بڕی یەك تریلۆن و 250 ملیۆن دینار بۆ هەرێم دەنێرێت

SNN-عەلی حەمەسەعید

ئەندامێكی لیژنەی دارایی لە ئەنجومەنی نوێنەرانی عێراق ئاماژە بەوەدەكات لەم مانگەوە لەكاتی دیاریكراودا پشكی هەرێم كە دەگاتە یەك ترلیۆن و 250 ملیار دینار بۆ هەرێم دەنێردرێت، هاوكات تا ئێستا بڕی ترلیۆنێك و 600 ملیار دینار بۆ هەرێم هاتووە، بەهەوڵی یەكێتیش ئەو بڕە پارەیەی وەك پشكی حكومەتی هەرێم دیاریكراوە حكومەت پابەند كراوە كەئەولەویاتی بۆ مووچە بێت.

د. نەرمین مەعروف ئەندامی لیژنەی دارایی لە ئەنجومەنی نوێنەرانی عیراق بەSNN ی راگەیاند: پرۆژە یاسای بودجەی گشتی كەوتووەتە بواری جێبەجێكردنەوە ئەوەش دوای ئەوەی رێنماییەكانی وەزارەتی دارایی و پلاندانان لەو بارەیەوە بڵاوكرانەوە، هەروەها بەپێی یاساكە حكومەتی عیراق مانگانە نزیكەی یەك ترلیۆن و 250 ملیار دینار وەك پشكی خۆی بۆ هەرێم دەنێرێت، كەبە هەوڵی فراكسیۆنی یەكێتی لە پەرلەمانی عیراق، حكومەتی هەرێم پابەند كراوە كە لەو پشكەی بۆی دێت ئەولەویات بدات بە مووچە

ئاماژەی بەوەشكرد، ئەگەر هەردوو حكومەتی هەرێم و عێراق پابەند بن بە جێبەجێكردنی بڕگەو مادەكانی پرۆژەیاسای بودجە ئەوا دەتوانین بڵێین لە ئایندەیەكی نزیكدا گەشەكردن و ئاوەدانكردنەوەو خزمەتگوزاری زیاتر لە عێراق و هەرێمی كوردستان جێبەجێدەكرێن چونكە لە میژووی عیراقدا بۆ یەكەمین جارە یاسایەكی بودجەی لەو شێوەیە كەبۆ ماوەی سێ‌ ساڵ بێت.

ئەو ئەندامەی لیژنەی دارایی لە پەرلەمانی عێراق ئەوەشی خستەڕوو، لە رۆژانیداهاتوودا حكومەتی عیراق پشتبەست بە یاسای بودجە مووچەی مانگی تەموزی فەرمانبەران دابەشدەكات، كە بێگومان پشكی هەرێمیش هەر پشتبەستە بەو یاسایە و هەموو مانگێك لەكاتی دیاریكراوی خۆیدا بۆی دێت، هەرچەندە لەچەند مانگی رابردوودا بڕی ترلیۆنێك و 600 ملیار دینار بۆ هەرێم هاتووە، ئەو بڕە پارەیەش لە پشكی هەرێم وەردەگیرێتەوە، هاوكات پشكی هەرێم 15 ترلیۆن دیناری ساڵانە و مانگانە یەك ترلیۆن و 250 ملیار دینارە.