دەستەی دەستپاکی عێراق داوای ئاشکراکردنی سامانی بەرپرسان دەکات

SNN

دەستەی دەستپاکی عێراق رایگەیاند، لەگەڵ هەرێمى کوردستان رێککەوتنێکیان واژۆکردووە بۆ رێگریى لە بەفیڕۆدانى سامانى گشتى، هاوکات داوا لە دەستەی دەستپاکی هەرێم دەکات هاوکارییان بکات.

ئەمڕۆ یەکشەممە 10ی ئازار،حەیدەر حەنون، سەرۆکی دەستەی دەستپاکی عێراق رایگەیاند، ڕەشنووسی ڕێککەوتنێک بۆ هەماهەنگی لەگەڵ دەستەی دەستپاکی هەرێمی کوردستاندا هەیە، ئەویش بەو پێیەی کە دەستەی دەستپاکی فیدراڵی سەرپەرشتی سەرجەم پارێزگاکان و ئاشکراکردنی سامانی سەرجەم بەرپرسان و فەرمانبەرانی پلە باڵا دەکات.

ئاماژەی بەوەکردووە، یەکێک لە میکانیزمەکانی گەندەڵکاران بۆ بەفیڕۆدانی هەوڵەکانی بەرەنگاربوونەوەی گەندەڵی ئەوەیە کە جیاوازی لە نێوان دەزگا چاودێرییەکان دروست دەکەن، بۆ ئەوەی لە ڕێی دروستکردنی ئاستەنگ بۆ یەکخستنی هەوڵەکانەوە، پارێزبەندی بۆ خۆیان زامن بکەن.

سەرۆکی دەستەی دەستپاکی عێراق ئەوەشی خستەڕوو، هەوڵەکانیان بۆ گەڕاندنەوەی دەیان داواکراو لە وڵاتانی دراوسێ بە تایبەتیش تورکیا بەردەوامن.

حەیدەر حەنون وتوویەتی “101 داواکراو بۆ تورکیا هەڵهاتوون و بەمزووانەش گەڕاندنەوەی ملیۆنێک و 500 هەزار دۆلار و نزیکەی ملیارێک دینار ڕادەگەیەنن کە بەمدواییە گەڕێندراونەتەوە بۆ عێراق.”