هەڵبژاردنی سەرۆکایەتی رووسیا بەڕێوەدەچێت

SNN

هاووڵاتیانی رووسیا دەچنە سەر سندووقەکانی دەنگدان و لە نێوان چوار کاندیددا، سەرۆکی داهاتووی وڵاتەکەیان هەڵدەبژێرن و پێشبینی دەکرێت ڤلادیمیر پوتین سەرۆکی ئێستا ماوەی شەش ساڵی دیکە لە پۆستەکەیدا بمێنێتەوە.

ئەمڕۆ هەڵبژاردنی سەرۆکایەتی رووسیا دەستیپێکرد و  114 ملیۆن کەس مافی بەشداریکردنیان لەو دەنگدانەدا هەیە و پرۆسەکە ماوەی سێ رۆژ دەخایەنێت.

جگە لە ڤلادیمیر پوتین سەرۆکی ئێستا هەریەک لە لیۆنید سلوتسکی، لە پارتی ئازادیی دیموکراتی، ڤلادیسلاڤ داڤانکۆڤ لە پارتی خەڵکی نوێ و نیکۆلای خاریتۆنۆڤن، لە پارتی کۆمیونیست خۆیان کاندید کردووە.

هەڵبژاردنەکە لەو ناوچانەی ئۆکرایناش بەڕێوەدەچێت کە لەلایەن رووسیاوە کۆنترۆڵکراون.

ڤلادیمیر پوتین بە چانسی یەکەمی سەرکەوتن لەم هەڵبژاردنەدا دادەنرێت و لە وەها ئەگەرێکدا تا ساڵی 2030 سەرۆکایەتی رووسیا دەکاتەوە.

لەم هەڵبژاردنەدا هیچ بەرهەڵستکارێک رکابەری پوتین ناکات و سەرجەم رکابەرە سەرسەختەکانی یان لە زیندانن، یان لە تاراوگەن یاخود گیانیان لەدەستداوە.

بەگوێرەی دوایین هەمواری دەستوور لە رووسیا، پوتین لە ئەگەر سەرکەوتنی دەتوانێت لە هەڵبژاردنی 2030شدا خۆی بپاڵێوێتەوە و تا 20236 لەو پۆستەدا بێت.