ترەمپ بەنیازە بۆ ساڵی 2024 خۆی کاندیدبکاتەوە

SNN

تۆڕی هەواڵی بی بی سی بەریتانی ئاشکرایدەکات، تیمەکەی ترەمپ رێکاری یاسایی لەبارەی ئەنجامی هەڵبژاردنەکەی ئەمریکا دەگرێتەبەر، ترەمپیش بەنیازە لە هەڵبژاردنی داهاتوو خۆی کاندیدبکاتەوە.

بە گوێرەی دەستووری ئەمریکا هەر سەرۆکێکی ئەمریکا لەتوانایدایە بۆ خولێکی دیکە خۆی کاندید بکات، ئیتر ئەگەر راستەوخۆ دوای ماوەی سەرۆکایەتیەکەی بێت یاخود لە هەڵبژاردنەکانی دواتردابێت، لەو چوارچێوەیەشدا بی بی سی لەزاری چەند سەرچاوەیەکی کۆشکی سپییەوە ئەوەی خستووەتەڕوو، ترەمپ هەر لە ئێستاوە باس لەوەدەکات لە ساڵی 2024دا خۆی بۆ پۆستی سەرۆک کاندید دەکات.

هاوکات میدیای ئەمریکا ئەوەی بڵاوکردووەتەوە، کایلێگ مەکەنانی بەرپرسی میدیایی کۆشکی سپی وتوویەتی: “ئەم هەڵبژاردنە کۆتایی نەهاتووە و زۆریشی ماوە تا کۆتایی بێت”، ناوبراو ئاماژەی بەوەکرد: “ساختەکاری لە هەڵبژاردنەکەدا کراوە”، بەبێ ئەوەی بەڵگەکانی باسبکات.

لەلایەکی دیکەوە تیمەکەی بایدن وتوویەتی، ئەگەر ئیدارەی ئەمریکا دەستاودەستکردنی دەسەڵات دوابخات ئەوا ئەوانیش رێکاری یاسایی لەوبارەیەوە دەگرنەبەر.

لە چەند رۆژی رابردوودا ئەنجامی هەڵبژاردنەکەی ئەمریکا لە بەرژەوەندی جۆو بایدن، کاندیدی دیموکراتەکان یەکلاکرایەوە.