سێ برای سوری بە تۆمەتی کاری تیرۆریستی لە ئەڵمانیا و دانیمارک دەستگیر کران

SNN

میدیاکانی ئەڵمانیا ئاشکرایانکردووە “سێ کەس دەستگیر کراون کە برای یەکترن و خەڵکی سوریان، بڕێکی زۆر مادەی کیمیاویان پێبووە لەگەڵ چەند دروشمێکی داعش-دا بەنیاز بوون کاری تیرۆریستی لە ئەڵمانیا و دانیمارک ئەنجامبدەن”.

سایتی دێر شپیگلی ئەڵمانی بڵاویکردووەتەوە “پیاوێکی تەمەن 30 ساڵ دەستگیر کراوە کە لەڕێگەی ئۆنلاینەوە ویستوێتی 10 کیلۆ کبریت و گیراوەی ئەلەمنیۆم لە پۆڵەنداوە بکڕێت و بینێرێت بۆ برایەکی لە ئەڵمانیا”.

بەگوێرەی گۆڤارەکە، پۆلیس توانیوێتی شوێنی گومانبارەکە دەستنیشان بکات و دەستیشبگرێت بەسەر چەندین چەک و تەقەمەنیدا کە لەشوێنی مانەوەی خۆی هەڵیگرتبوون.

دوای ئاشکرابوونی پیلانەکە، برایەکی گومانلێکراوەکە لە دانیمارک دەستگیر کراوە و دواتر دەرکەوتووە بڕێکی زۆر بابەتی کیمیاوی پێبووە و بەهۆی ئەویشەوە ناونیشانی سێیەم برایان دۆزراوەتەوە لە ناوچەی هیسن لە ئەڵمانیا.