بکوژانی دوو ژنە سەرکردەکەی هەسەدە دەستگیر کران

SNN

هێزەکانی سوریای دیموکرات (هەسەدە) توانییان بکوژانی دوو بەرپرسی خۆجێیی شارۆچکەی تەل شایەری باشووری حەسەکە دەستگیر بکەن کە مانگی رابردوو پاش رفاندنیان بە سەربڕدراویی دۆزرانەوە.

ئاژانسی هەواڵی هاوار بڵاویکردووەتەوە هێزەکانی نەهێشتنی تاوان سەربە هەسەدە توانیویانە دوو کەس دەستگیر بکەن هەستاون بە کوشتنی سەعدە هەرماس هاوسەرۆکی ئەنجوومەنی شارەوانیی تەل شایەر و هند خزەیری جێگری”.

بەپێی بەیاننامەیەکی هێزەکانی نەهێشتنی تاوانی سەربە هەسەدە، ئۆپراسیۆنێکی سەرکەوتوو لە ریفی دێرەزور بۆ هەڵکوتانە سەر شوێنی مانەوەی بکوژەکان کراوە و دواتر قۆڵبەستکراون.

رۆژی 28ی مانگی رابردوو رێکخراوی داعش بەرپرسیارێتیی خۆی لە کوژرانی دوو ژن، کە بەرپرسیارێتییان هەبوو لە ئیدارەی رۆژئاوای کوردستان،راگەیاند.

رۆژی دووشەممە 25-1-2021، روانگەی سووری بۆ مافەکانی مرۆڤ بڵاویکردەوە، کە تەرمی دوو ژن لە شارۆچکەی دەشیشە لە گوندەوارەکانی حەسەکە، بە سەربڕاوی دۆزراونەتەوە و دوای لێکۆڵینەوە، ناسنامەی ژنەکان ئاشکرا بوو، کە بریتی بوون لە؛

– سەعدە فەیس هەرماس، سەرۆکی ئەنجوومەنی مەدەنیی شارەوانیی تەل شایەر

– هند لەتیف حەنیف، بەرپرسی بەشی ئابووریی ئەنجوومەنەکە