هەفتەی داهاتووش بارێکی دیکەی ڤاکسین دەگاتە هەرێمی کوردستان

SNN

لەکاتی گەیشتنی ڤاکسینەکەدا سامان بەرزنجی وەزیری تەندروستی رایگەیاند “ئەم جۆرە ڤاکسینە لە دنیادا بەکاردێت و راهێنان لەسەر ئەم جۆرە کراوە بە کارمەندانی تەندروستی و دەبێت بە شێوازێکی زانستییانە لە مرۆڤ بدرێت و پێشینەش بۆ گروپی مەترسیدار دەبێت”.

وەزیری تەندروستی هەرێم وتی: “هەفتەی داهاتووش کاروانێکی دیکەی ڤاکسین دەگاتە عێراق و لەو بارە ڤاکسینەش پشکی هەرێمی کوردستان بەردەست دەبێت”.

لای خۆیەوە کونسوڵی چین رایگەیاند “خۆشحاڵین توانیومانە ئەم هاوکارییە بگەیەنین بە عێراق و هەرێمی کوردستان و سەرەڕای کەمیی ڤاکسین لە وڵاتی خۆمان، بڕیارماندا هاوکاری عێراق بکەین”.

وتیشی: “لە ئێستادا چین یارمەتی 50 وڵاتی دیکەی داوە بەم ڤاکسینە و لە بەرنامەدایە 27 وڵاتی دیکەش پێکوتەیان بۆ بنێردرێت”.

پاشنیوەڕۆی ئەمڕۆ سێشەممە پێنج هەزار ڤاکسینی لە بازگەی شێراوەوە تایبەت بە کۆرۆنا گەیشتە هەرێمی کوردستان.

وەزیری تەندروستیی حکومەتی هەرێم ڤاکسینەکەی وەرگرتووە و وەک هەنگاوی یەکەم کارمەندانی تەندروستی و بەساڵاچووان لە ریزی پێشەوەی ئەو کەسانەدان کە پێکوتەکە وەردەگرن.

ڤاکسینەکە لە جۆری سینۆ فارمی چینییە و چوارەم ڤاکسینی رێگەپێدراوە لەلایەن رێکخراوی تەندروستی جیهانەوە.

ئەمشەوی رابردوو، یەکەم کاروانی ڤاکسینی کۆرۆنا گەیشتە عێراق و ڤاکسینەکە لە چینەوە نێردراوە.