پێکدادان لەنێوان پێشمەرگە و پەکەکە لە برادۆست روویدا

SNN

درەنگانی شەوی رابردوو لە گەرووی ناوبەردی شارۆچکەی سیدەکان شەڕ لە نێوان هێزێکی پێشمەرگە و پەکەکە دروستبوو، هيچ زيانێکی گيانی لێنەکەوتەوە”.

بەهرام عەریف یاسین، فەرماندەی فەرماندەیی هەڵگوردی پێشمەرگە بەمیدیاکانی پارتی راگەیاندووە: “ئەمشەو گەریلاکانی پارتی کرێکارانی کوردستان (پەکەکە) لە ناوچەی گردخێوەتی دەڤەری برادۆست، هێرشیان كردوەتە سەر خاڵێكی هێزی پێشمەرگەی كوردستان کە پێشمەرگەكانی سوپای باڵەكی تێدایە”.

وتيشی “ژمارەیەک چەکداری پەکەکە بە ئاڕ پی جی، قەناس و بیکەیسی و کڵاشینکۆف هێرشیان کردووەتە سەر پێشمەرگە، بەڵام پێشمەرگە وەڵامی هێرشەکەيان داوەتەوە”.

هەرچەندا تا ئێستا میدیاکانی سەر بە پەکەکە زانیارییان لەبارەی شەڕەکە بڵاونەکردووەتەوە، بەڵام باس لەوەدەکرێت “ئامانج لەو هێرشەی پەکەکە ئەوە بووە: “پەکەکە ترسى ئەوەیان هەبووە بارەگاکە بۆ چاودێرى لەلایەن هێزەکانی تورکیاوە بەکاربهێنرێت، دوای پێکدادانەکانیش پێشمەرگە لەو بارەگایە پاشەکشەى کردووە”.