قوباد تاڵەبانی لەگەڵ شاندێکی ئەمریکی پەرەپێدانی کەرتی تایبەتیان تاوتوێکرد
SNN
قوباد تاڵەبانی جێگری سەرۆک وەزیرانی هەرێمی کوردستان لەگەڵ وەفدێکی ئەمریکی بە سەرپەرشتی رۆبەرت وۆلەر کۆنسوڵی گشتی ئەمریکا لە هەرێم کۆبووەوە و پێکەوە چۆنییەتی پەرەپێدانی کەرتی تایبەت و چەند پرسێکی گرنگی دیکەیان تاوتوێ کرد.
لە کۆبوونەوەکەدا کە ئەمڕۆ چوارشەممە بەڕێوەچوو، هەردوولا هاوڕابوون لەسەر پێویستی گرنگیدان بە کەرتی تایبەت لە هەرێمی کوردستان و لەم چوارچێوەیەشدا باسیان لە پێشخستنی ئەم کەرتە کرد.
لە بەشێکیتری کۆبوونەوەکەدا، جێگری سەرۆک وەزیران باسی لە پێویستی هاندانی وەبەرهێنەرانی ئەمریکی کرد بۆ وەبەرهێنان لە هەرێمی کوردستان و ئامادەیی حکومەتی هەرێمی دەربڕی بۆ هەموو جۆرە کارئاسانییەک بۆ وەبەرهێنەرانی ئەمریکی لە هەرێمی کوردستان.
هەر لە کۆبوونەوەکەدا باس لە پێویستی پێداچوونەوە و چاکسازی کرا لە سیستمی بانکی هەرێمی کوردستان کە بە جۆرێک رێکبخرێتەوە ببێتە پاڵپشتی وەبەرهێنەران و رۆڵی گرنگ ببینێت لە پێشخستنی کەرتی تایبەت.
لە تەورێکی دیکەی کۆبوونەوەکەدا باس لە پێویستی جێبەجێکردنی یاسای بودجەی 2021ی عێراق کرا و کۆنسوڵی ئەمریکا پشتگیری خۆی بۆ هەوڵەکانی حکومەتی هەرێم دەربڕی بۆ جێبەجێکردنی یاساکە.
