“بێلاروسیا بە نایاسایی کۆچبەران رەوانەی ئەوروپا دەکات”

SNN

حکومەتی لیتوانیا رەخنەی توندی لە بێلاڕوسیا گرت بەوەی ئاسانکاری بۆ کۆچبەران کردووە بەمەبەستی ئەوەی پرسی کۆچبەران دژ بە ئەوروپا بەکاربهێنێت، لیتوانیا داوادەکات سزای زیاتر بەسەر بێلاڕوسیادا بسەپێندرێت.

کابرێلیوس لانسبێرگیس وەزیری دەرەوەی لیتوانیا رایگەیاند: “لەکاتێکدا بێلاڕوسیا پرسی کۆچبەران وەک چەکێکی سیاسی بەکاردەهێنێت، داوا لە ئەندامانی یەکێتی ئەوروپا دەکەم کە ستراتیجی و هەڵوێستی هاوبەشیان دژ بەو وڵاتە هەبێت”.

وەزیری دەرەوەی لیتوانیا باسی لەوەکرد، بێلاڕوسیا بە نایاسایی کۆچبەران لە دەرەوە هاوردەی وڵاتەکەی دەکات و هەر بە شێوەیەکی نایاسایی رەوانەی ئەوروپایان دەکات.

ئەمە لەکاتێکدایە کۆچبەران لە سنوورەکانی بێلاڕوسیاوە خۆیان دەگەیەننە لیتوانیا و تا ئێستا سەدان کۆچبەر کە زۆرینەیان عێراقین بەو شێوەیە خۆیان گەیاندووەتە لیتوانیا، هەر بەو هۆیەشەوە هەینی رابردوو لیتوانیا پەرژینێکی سنووری لە نێوان هەردوو وڵاتەکە دروستکرد.