هاتووچۆی هەولێر: تۆمەتبارێک تەقەی کردووە و کارمەندێکی بریندارکردووە

SNN

لەبەردەم بەڕێوەبەرایەتیی هاتووچۆی هەولێر کەسێک کە تۆمەتباربووە بە دزینی ماتۆڕسکیلەکانی بەردەم بەڕێوەبەرایەتییەکە لەکاتی هەوڵی دەستگیرکردنی لەلایەن کارمەندانی هاتوچۆی هەولێر تەقەی کردووە و یەکێک لە کارمەندانی بەڕێوەبەرایەتییەکەی بریندارکردووە.

فازڵ حاجی وتەبێژی بەڕێوەبەرایەتی هاتووچۆی هەولێر لە راگەيەندراوێکدا بڵاوەکردەوە: “دوای دووبارەبوونەوەی دیاردەی دزینی ماتۆڕسسکیلی هاووڵاتییان لەبەردەم بەشی مۆڵەتی شوفێری، لەدوای بەدواداچوون بۆ حالەتەکە، چەند کارمەندێکی هاتووچۆ لەبەشی مۆڵەت ئەرکی دەستگیرکردنی تۆمەتبارەکەیان لەکاتی دزییەکەدا پێسپێردرا، کاتژمێر نزیک 11ی پێشنیوەڕۆ توانرا کەسە تومەتبارەکە دەستنیشان بکرێت وهەوڵی دەستگیرکردنی درا”.

دەشڵێت “لەکاتی هەوڵدان بۆ دەستگیرکردنیدا تۆمەتبارەکە ڕووبەڕووی کارمەندانی بەڕێوەبەرایەتی هاتووچۆی هەولێر بووەتەوە و تەقەی کردووە، لەئەنجامدا کارمەندێکی بەشی مۆڵەت برینداربوو، تۆمەتبارەکەش دەستگیرکرا”.

بەڕێوەبەرایەتیی هاتوچۆی هەولێر داوا لەو هاووڵاتییانە دەکات کە ماتۆرسکیلیان دزراوە سەردانی بەڕێوەبەرایەتیی ئاسایش بکەن بۆ تۆمارکردنی سکاڵا دژی تۆمەتبارەکە.