وتەبێژی وەزارەتی کارەبا: بەغدا زۆر سەرسامە بە پڕۆژەکانی کارەبای هەرێم

SNN

وتەبێژی وەزارەتی کارەبای حکومەتی ھەرێمی کوردستان باسی ئەنجامی سەردانی وەزارەتی کارەبای حکومەتی ھەرێم بۆ بەغدا دەکات و دەڵێت: ”بەغدا زۆر سەرسامە بە پڕۆژەکانی کارەبای ھەرێم و دەیانەوێت سوود لە ئەزموونی ئێمە وەربگرن و پڕۆژەی ھاوشێوە دروست بکەن، ھاوکاریی ھەرێمی کوردستان بکەن، چونکە ئێمە زۆرمان ھاوکاریی ئەوان کردووە”.

ئومێد ئەحمەد، وتەبێژی وەزارەتی کارەبای ھەرێم رايگەياند: ”سەردانی وەزارەتی کارەبا بۆ بەغدا دوای سەردانی وەزیری کارەبای حکومەتی عێراق بۆ ھەرێمی کوردستان ھات لە چوارچێوەی ئەو ھەماھەنگییەی ھەیە لە نێوان ھەردوو حکومەتی ھەرێم و بەغدا، بەتایبەت ئەو پلانە ھاوبەشانەی ھەمانە لە ماددەی 140 بۆ ئەوەی ھاوکاریی زیاترمان بکەن، چونکە ئێمە کاری باشمان بۆ ئەوان کردووە لە مەخموور و ئەلقووش و ناوچەکانی دیکە و بەردەوامین لە ھەماھەنگی لەنێوان ھەردوولادا، کاتێک ئێمە، یان ئەوان پێویستمان بە وەزە ھەبێت.”

ئومێد ئەحمەد وتیشی: ”سەردانەکە ئەنجامێکی باشی ھەبوو و ھەندێک داواکاریمان ھەبوو بە نووسراو دامان بە ئەوان و ئەوانیش سوپاسی ئێمەیان کرد و زۆر سەرسام بوون بە ھەرێمی کوردستان، بەتایبەت پێوەری زیرەک و سوودوەرگرتن لە غازی بەفیڕۆچوو، ئەوەی کە بێکەڵکی لە سامان دەڕوات، کە لە گەرمیان ئێستا 160 مێگاوات لەوە کارەبا بەرھەم دێنین و ئەوان ئەوەیان وەکوو نمونە وەرگرتووە بۆ ئەوەی کەڵک لە ھەمان شێوازی ئێمە وەرگرن.”

باسی لەوەش کرد: ”لەو چوارچێوەیەدا ئەو وەزەیەی وەبەرھێنەرەکان داویانە بە دەرەوە لە کاتێکدا ئێمە سووتەمەنیمان نەبوو، وەحدەکان وەستا و ئەو ڕێگەیەمان داوە بە وەبەرھێنەرەکان و ھەرکاتێک وزەی زیادمان ھەبوو، سروشتیە بیدەین بە ئەوان و بیدەین بە شێوینی دیکە و ئەگەر وزەمان پێویست بوو لە شوێنی دیکە ھاوردەی دەکەین، وەکوو ئەوەی لە تورکیا ھێنامان، لە شوێنک وزە پێویست بێت وەریدەگرین و ئەگەر زیاد بوو دەیدەینە دەرەوە.”

وتەبێژی وەزارەتی کارەبا دەشڵێت: ”خۆمان بۆ وەرزی زستان ئامادەکردووە، دوو وەحدەمان لە خەبات ھەیە و یەکێک لە ھەولێر و ھەندێک چاکسازی لە وەحدەکان دەکەین و ئەو وێستگانەی لە کۆن تەواو نەبوون بەردەوامین لە تەواوکردنیان، بۆیە ئێستا سێ ھەزار و  500مێگاواتمان ھەیە و بڕیارە بۆ وەرزی زستانیش زیاتری بکەین.”