ماوەی پێنج رۆژە پەنابەرێکی سیاسی لە هەولێر دەستگیرکراوە

SNN

ئەنجومەنی هاوڵاتیانی باکووری کوردستان لە هەرێمی کوردستان، داوای ئازادکردنی ئەندامێکیان دەکەن کە چەند رۆژێکە لەلایەن هێزەکانی پارتییەوە لە هەولێر دەستگیرکراوە.

فەوزیە حەمید، ئەندامی ئەنجومەنی باکووریەکان لە هەرێمی کوردستان لەراگەیەنراوێکدا باسی لەوەکردووە: موسا چفتچی چەندین ساڵە، لە ناو پارتە سیاسیەکاندا خەبات دەکات، بە هۆی خەبات و تێکۆشانەکانیەوە، چەندین ساڵ لە کونجی زیندان ماوەتەوە، لە ساڵی 2016 بە هۆی ئەندامبوونی لە  هەدەپە ، دەوڵەتی تورکیا دۆسیەی لە سەر کردەوە بۆ ئەوەی سزای بدات، بەڵام ئەو ڕێگای باشوری کوردستانی گرتەبەر.

ئاماژەی بەوەشکرد، موسا چفتچی ماوەی شەش ساڵە لە هەرێمی کوردستان ژیان بەسەر دەبات، لە 10ی ئادار، بۆ پێشوازی لە خانەوادەکەی ڕۆشتووە بۆ هەولێر، لە لایەن ئاسایشی هەولێرەوە بێ سەروشوێن کراوە، ماوەی پێنج ڕۆژە ئاسایشی گشتی هەولێر بێ هۆکار، دەستگیریان کردووە.

ڕوونیکردەوە ئەنجامی سیاسەتی پارتی لە بەرامبەر خەڵکی باکووری کوردستان ئەوەیە یان ڕادەستی دوژمنیان دەکاتەوە، یان زیندانیان دەکات، یان لە ماڵ و ژیانی خۆیان دەربەدەریان دەکات.

باسی لەوەشکردووە: موسا چفتچی لە بەرامبەر سیاسەتی باشوری کوردستان هیچ هەڵە و بێ ڕێزیەکی ئەنجام نەداوە، لە دژی دەوڵەتی تورکیا تێکۆشانی کردووە، ئێمە دەزانین دەوڵەتی تورکیا دوژمنی گەلی کوردە، بەڵام تێناگەن کە پارتی بەو جۆرە مامەڵە دەکات.

جەختیشی کردوەتەوە:” تا هاورێکەمان ئازاد نەکرێت، ئێمە چالاکیەکانمان بەردەوامی پێ دەدەین، ڕووی پارتی بۆ هەموو لایەک ئاشکرا دەکەین”.