لە سلێمانی دەستكرا بەدابەشكردنی بەنزینی 690 دیناری و لە هەولێریش خۆپیشاندانە

SNN-عەلی حەمە سەعید

ئەمڕۆ لە شەش بەنزینخانەی شاری سلێمانی دەستبەدابەشكردنی بەنزین بە نرخی 690 دینار كرا كە تایبەت بە هێڵەكانی تاكسی و پاس و هێڵە گشتییەكان، هاوكات دابینكردنی بەنزینی 800 دیناریش بۆ وێستگەكانی دیكە بەردەوامی هەیە، هەرئەمڕۆش بەهۆی نەمانی بەنزین لە شاری هەولێر للایەن بەشێك لە شۆفێران خۆپیشاندانی ناڕەزایەتی ئەنجامدرا.

كەریم عەلی، سەرۆكی لیژنەی وەزە و پیشەسازی لە ئەنجومەی پارێزگای سلێمانی بە SNNی ڕاگەیاند: دوای ئەوەی لەماوەی ڕابردوودا بە نوسراوی فەرمی داوامان لە وەزارەتی سامانە سروشتییەكان كردبوو كە هاوشێوەی عێراق بەنزینی 690دیناری بۆ وێستگەكان دابین بكات، ئەمڕۆ تواندرا ئەو بەنزینە لە شەش بەنزینخانەی شاری سلێمانی دابەشبكرێت كە تایبەت بە هێلەكانی پاس و تاكسی و هێلە گشتییەكانی گواستنەوەی هاووڵاتیان، هاوكات بڕی ئەو بەنزینەی كە بۆ سلێمانی تەرخانكراوە بڕی 400 هەزار لیترە.

ئاماژەی بەوەشكرد، جگە لە دابینكردنی ئەو بەنزینە 690دینارییە لە لایەن حكومەتی هەرێمەوە دابینكردنی بەنزینی 800 دیناریش بۆسەرجەم وێستگەكان لە شارو شارۆچكەكانی هەرێمی كوردستان بەردەوامی دەبێت، لە قۆناغی یەكەمدا میكانیزمی دابەشكردنی بەنزینی 690 دیناری هەرێم بۆ ئەو وێستگانە دابیندەكرێت كە بەنزین بۆ تاكسی و پاس و هێڵە گشتیەكان دابەشدەكەن و ئەگەریش بڕەكەی زۆر بوو ئەوا لە داهاتوودا دەدرێت بەسەرجەم وێستگەكان.

لەلایەكی دیكەوە هەرئەمڕۆ چوار شەممە بەهۆی نەمانی بەنزین لە چەند وێستگەیەكی شاری هەولێر، شۆفێرانی ئەو شارە دەستیان بە خۆپیشاندانی ناڕەزیەتیكرد و داوای دابینكردنی بەنزین دەكەن بۆ ئۆتۆمبێلكانیان بەنرخی 690 دینار.