پەتای سكچوون و ڕشانەوە بەڕێژەیەكی زۆر لە پارێزگای دهۆك بڵاوبووەتەوە
دهۆک
SNN-عەلی حەمە سەعید
ماوەی چەند ڕۆژێكە پەتای سكچوون و ڕشانەوە لە سنووری پارێزگای دهۆك بڵاوبووەتەوە و بەهۆیشەوە بە دەیان كەس تووشی ئەو پەتایە بوون، هاوكات هۆشداریش دەدرێت لە ئەگەری زیاتر بڵاوبوونەوەی ئەو پەتایە لە سنووری پارێزگای دهۆك و دەوورووبەری.
بەگویرەی ئەو زانیارییانەی كە لە بەڕێوەبەرایەتی تەندروستیی دهۆك بە SNNدراون ئەوەخراوەتەڕوو، ماوەی چەند ڕۆژێكە پەتای سكچوون و ڕشانەوە لە سنووری پارێزگای دهۆك بڵاوبووتەوە و ڕۆژانە بە دەیان نەخۆش سەردانی نەخۆشخانە و مەڵبنەدە تەندرستییەكانی سنوورەكە دەكەن بەمەبەستی وەرگرتنی چارەسەر، هاوكات پزیشكانی پسپۆڕیش هۆشدارییان داوەتە لایەنە پەیوەندیدارەكان كە پەتای سكچوون و ڕشانەوە ئەگەر ئاوا بەردەوامبێت ئەوا ژمارەیەكی زۆر لە هاووڵاتیان لە نەخۆشخانەكان دەخەوێندرێن.
ئاماژە بەوەشكراوە، پزشكانی پسپۆڕ ئەوەیان بۆ ڕوونبووتەوە كە ئەو جۆرە پەتایە لە رێگەی خواردن و خواردنی پیسەوە دەگوازرێتەوە و زیاتر بڵاودەبێتەوە، باشترین رێگە بۆ خۆپارێزیكردن لێی دوور كەوتنەوەیە لە خواردنی دەرەوە دڵنیابوونەوە لە پاكی ئاوی خواردنەوەیان، بۆ ئەومەبەستەش داوا لەهاووڵاتیان كراوە كە دوای چوونە تەوالێت و پێش نانخواردن و دوای نان خواردن 20 بۆ 30 چركە دەستییان بە سابوون و هۆیەكانی پاككەرەوە بشۆن.
هەر لە زانیارییەكانی SNN ئەوەش هاتووە كە لە ئێستادا ئەو كەسانەی تووشی ئەو سكچوون و ڕشانەوەیە دەبن یان منداڵانن یاخد كەسانی بەتەمەنن ئەوانەی لە تەمەنێکی گەنجیدان كەمتر تووشی ئەو پەیتایە دەبن، هاوكات ئەو كەسانەشی كە تووشدەبن، پاش سەردانیكردنیان بۆ نەخۆشخانەكان دەرمانی دژە بەكتریایان پێدەدرێت و هەندێكیشان بە توندی پەتاكەیان گردتووە لە نەخۆشخانەكان خەوێندراون.
بۆوەرگرتنی زانیاری زیاتر لەسەر هۆكاری بڵاوبوونەوەی ئەم نەخۆشییە SNN چەند جارێك پەیوەندی بە بەڕێوەبەرایەتی تەندروستی پارێزگای دهۆكەوە كرد بەڵام وەڵامی پەیوەندییەكانیان نەدایەوە.
