زیاتر لەدوو هەفتەیە هەناردەكردنی نەوت لە كێڵگەی سارتەی هەولێر ڕاگیراوە

SNN-عەلی حەمە سەعید

بە هۆی ناڕەزایی دانیشتووانی گوندەكانی سارتە و چڕە لە سنووری پارێزگای هەولێر ماوەی زیاد لە دوو هەفتەیە هەناردەكردن و گواستنەوەی بەرهەمی هەشت كیلگەی نەوتی لە كێلگەی سارتە، ڕاگیراوە و دانیشتووانی ئەو گوندانە داوای دامەزراندن لەو كێڵگە نەوتییانە، تا ئێستا وەڵامیان نەدراوەتەوە و بەوهۆیشەوە بەرهەمی ڕۆژانەی ئەو كێڵگە نەوتییە كە دەگاتە پێنج هەزار بەرمیل نەوتی ڕۆژانە ڕاگیراوە.

بەگوێرەی زانیارییانی SNN كە سەرچاوەیەكی تایبەت دەستكەوتوون ئەوە خراوەتەڕوو، ماوەی زیاد لە دوو هەفتەیە دانیشتووانی گوندەكانی سارتە و چڕە و گوندەكانی دیكەی دەوروبەری كیلگەی نەوتی سارتە، ڕێگەی سەرەكی گەیشتن بە كێلگە نەوتییەكەیان داخستووە و ڕێگە نادەن كارمەندانی ئەو كێڵگە نەوتییە بڕۆنە سەركارەكانیان، هاوكات ڕێگەش بە هیچ دەزگایەكی ڕاگەیاندن نادەن ڕووماڵی ناڕەزایەتییەكەیان بكەن و تەنها داواكاریشیان دامەزراندنی گەنجەكانیان لەسەر ئەو كیڵگە نەوتییە.

ئاماژە بەوەشكراوە، كێڵگەی نەوتی سارتە لەلایەن كۆمپانیای ( شیڤرۆن) بەڕێوە دەبرێت و لەهەشت بیری نەوت پێكهاتووە كۆمپانیای (ئۆیل سێرفز) كە كۆمپانیایەكی ناوخۆییە خزمەتگوزارییەكان بۆ كارمەندانی كۆمپانیای ( شیڤرۆن) دابیندەكەن و بەرهەمی  ڕۆژانەیان نزیك دەبێتەوە لە پێنج هەزار بەرمیل نەوتی ڕۆژانە.

SNNئەوەشی زانیوە كە تا ئێستا بەرپرسانی حكومەتی هەرێم و هەروەها ئەو كۆمپانیایەی كە كێڵگە نەوتیەكە بەڕێوەدەبات نەیانتوانیوە لەگەڵ دانیشتووانی ئەو گوندانە بگەنە رێككەوتن، چونكە دانیشتووانی سنوری ئەو كیڵگە نەوتییە بەبێ‌ هیچ مەرجێك داوای دامەزراندن دەكەن و بە پێچەوانەوە ریگە نادەن لەو كێڵگە نەوتیە كاربكرێت.