تورکيا داواکاری عێراقی بۆ دەستپێکردنەوەی هەناردەی نەوتی هەرێم رەتکردەوە

SNN

ئاژانسی بلومبێرگ لە زاری بەرپرسێکی تورکياوە رايگەياندووە: ئەنقەرە داواكاری عێراقی بۆ دەستپێكردنەوەی هەناردەی نەوتی كوردستان رەتكردووەتەوە.

ئاژانسەکە باسی لەوەشکردووە: توركیا دەیەوێت لەبارەی قەرەبووی هەناردەی نەوت دانوستان بكات, پێش كردنەوەی هێڵی بۆری و بەندەرەكەی بە رووی نەوتی عێراقیدا.

هاوکات بەرپرسێكی عێراقی رايگەياندووە: ئەنقەرە بە بەغدادیوتووە, كاری چاككردنەوەی بەندەرەكە كە بەهۆی بومەلەرزەكەوە زیانی بەركەوتووە, تا ئێستا بەردەوامە.

هاوکات، وەزیری نەوتی عێراق ئاماژەی بەوەکردووە: دەیەوێت هەناردەی نەوتی هەرێم لەڕێی بەندەری جەیهانەوە دەستپێبكاتەوە, بەڵام چاوەڕێی بەدەستهێنانی ڕەزامەندی توركیایە.

وتەبێژی وەزارەتی نەوتی عێراقيش جەختدەکاتەوە: لایەنی عێراقی سەرجەم رێوشوێنەكانی پەیوەست بە پرۆسەی دەستپێكردنەوەی هەناردەی نەوتی تەواوكردووەو ئەوەش بەتوركیا راگەیەندراوەو چاوەرێی وەڵامین.

عێراق ئامادەیە (485)هەزار بەرمیل نەوتی رۆژانە هەناردەبكات, لەنێویانیدا (400)هەزار بەرمیلی لە كوردستان و نزیكەی (75_85)هەزاریشی لەكێڵگەكانی كەركوكەوە.