ئاستى ئاوى به‌نداوى ده‌ربه‌ندیخان رۆژانه 3 بۆ 4 سم داده‌به‌زێت
به‌نداوى ده‌ربه‌ندیخان | فۆتۆ: KRG
SNN
به‌ڕێوه‌به‌رى به‌نداوى ده‌ربه‌ندیخان رایده‌گه‌یه‌نێت، رۆژانه ئاستى ئاوى به‌نداوى ده‌ربه‌ندیخان 3 بۆ 4 سم داده‌به‌زێت، ده‌شڵێت: “له ئێستادا 40٪ى به‌نداوه‌كه ئاوى تێدایه”.
ئه‌مڕۆ یه‌كشه‌ممه 19ى تشرینى دووه‌م، سامان ئیسماعیل، به‌ڕێوه‌به‌رى به‌نداوى ده‌ربه‌ندیخان به SNNى راگه‌یاند، “تاوه‌کو ئێستا نزیکەی 30 ملم بارانباریوە. به‌شێوه‌یه‌كى گشتى رێژەی ئاو له‌م كاته‌دا زیاد ناکات، به‌ڵام به‌و دۆخه‌ى كه ئێستا هه‌یه هێشتا ئاستى ئاوى به‌نداوه‌كه له ساڵى پار ئه‌م مانگه 400 ملیۆن مه‌تر سێ جا زیاتره”.
له وه‌ڵامى ئه‌و پرسیاره‌ى ئایا له ئێستادا ئاستى ئاوى به‌نداوه‌كه چه‌نده؟ سامان ئیسماعیل وتى: “خۆى به‌نداوه‌كه سێ ملیار مه‌تر سێجا ئاو ده‌گرێت، به‌ڵام له ئێستادا ته‌نیا 40٪ى به‌نداوه‌كه ئاوى تێدایه، رۆژانه‌ش 4 بۆ 5 سم ئاستى ئاوه‌كه كه‌م ده‌كات”.
له‌باره‌ى به‌رده‌وامى پرۆسه‌ى نۆژه‌نكردنه‌وه‌ى به‌نداوه‌كه، به‌ڕێوه‌به‌رى به‌نداوى ده‌ربه‌ندیخان ئاشكراى كرد، “له ساڵى 2019ه‌وه ئه‌و پرۆسه‌یه ده‌ستیپێكردووه و ئه‌و شوێنانه‌ى زیانیان پێگه‌یشتووه نۆژه‌نكراونه‌ته‌وه و له ئێستادا له قۆناغى دووه‌مى كاركردنداین، ته‌نیا قیرتاوكردنى رێگه‌كان ماوه”.
به وته‌ى سامان ئیسماعیل، “زۆرینه‌ى ئاوى به‌نداوه‌كه له دروستكردنى وزه‌ى كاره‌بادا به‌كاردێت و تاوه‌كو رێژه‌ى ئاوه‌كه زیاتربێت، بڕى به‌رهه‌مهێنانى كاره‌باكه‌شى زیاتر ده‌بێت”.
