“ئەو ئەقڵەی ئێستا لە كەركوك دەسەڵاتدارە دژی مافی دانیشتوانە رەسەنەكەی كەركوكە”
SNN-عەلی حەمە سەعید
كاندیدێكی لیستی هاوپەیمانی كەركوك هێزوئیرادەمانە ئاماژە بەوەدەكات دەسەڵاتداری ئێستای كەركوك هۆكاری جیاكاری و نادادپەروەرییەو دەستیان لە گۆڕینی گرێبەستە كشتوكاڵییەكانی سنووری پارێزگای كەركوكدا هەبووە و چەندین گرێبەستی زەوییە كشتوكاڵییەكانی خاوەنە رەسەنەكانیان هەڵوەشاندۆتەوە، هاوكات جەختیش دەكاتەوە ئەو ئەقڵەی ئێستا كەركوك بەڕێوەدەبات دژی مافی دانیشتوانە رەسەنەكەیەتی.
بڕیارشوانی، كاندیدی ژمارە 18لەسەر لیستی هاوپەیمانی كەركوك هێز و ئیرادەمانە بە SNNی رایگەیاند: “ئەو ئەقڵەی ئێستا لە كەركوك دەسەڵاتدارە دژی مافی دانیشتوانە رەسەنەكەی كەركوكە و هۆكاری جیاكاری و نادادپەروەرییە و دەستیان لە گۆڕینی گرێبەستە كشتوكاڵییەكانی سنووری پارێزگای كەركوكدا هەبووە و چەندین گرێبەستی زەوییە كشتوكاڵییەكانی خاوەنە رەسەنەكانیان هەڵوەشاندۆتەوە و گرێبەستیان بۆ عەرەبی هاوردە”.
ئاماژەی بەوەشكرد، “ئێستا ململانێیەكی قورس لە نێوان خەڵكی هاوردە و دانیشتوانە رەسەنەكەی كەركوك هاتووەتە ئاراوە، خەڵكی هاوردە بۆ كەركوك دەیانەوێت بەم هەڵبژاردنە بیسەلمێنن كە ئەوان زۆرینەی خەڵكی كەركوكن و دانیشتوانە رەسەنەكەی كەركوك پشتگوێ بخەن، بۆیە زۆر گرنگە هاووڵاتیانی كورد بە گەرموگوڕییەوە بەشداری هەڵبژاردن بكەن و دەنگ بدەن بە لیستی هاوپەیمانی كەركوك هێزوئیرادەمانە كە ژمارەكەی 142 ووە”.
ئەو كاندیدەی لیستی هاوپەیمانی كەركوك هێزوئیرادەمانە ئەوەشی خستەڕوو، “دەسەڵاتی تاكڕەو و خۆسەپێن لە پارێزگای كەركوك لە پرۆژە خزمەتگوزارییەكانیشدا جیاوازی گەورە دەكات بەجۆرێك ناوچە عەرەبییەكەن خزمەتگوزاری زیاتریان پێدەگات و ناوچە كوردییەكان و پێكهاتەكانی دیكە، پشتگوێ خراون، بۆیە داواكارین كە كەركوكییەكان ڕۆژی هەڵبژاردن بكەنە ڕۆژی گۆڕینی دەسەڵاتی تاكڕەو لە پارێزگاكەیان”.
