“پارتی پێشتر لەرێگەی لیستی كەسانی مردوو دیزاینی پێشوەختەی بۆ ئەنجامی هەڵبژاردنی دەكرد”
لوقمان وەردی فۆتۆ: SNN
عەلی حەمەسەعید-SNN
ئەندامێكی ئەنجومەنی سەركرایەتی یەكێتیی نیشتمانیی كوردستان ئاماژە بەوەدەكات “دواخستنی هەڵبژاردن لەسەر داوای پارتی ستەمێك بوو لە پرۆسەی دیموكراسی كرا، دواجاریش دەركەوت كە پارتی لەهەڵبژاردن دەترسا، هاوكات پارتی پێشتر لەرێگەی لیستی كەسانی مردوو دووبارە دیزاینی پێشوەختەی بۆ ئەنجامی هەڵبژاردنی دەكرد”.
لوقمان وەردی، ئەندامی ئەنجومەنی سەركردایەتی یەكێتی نیشتمانی كوردستان بە SNNی ڕاگەیاند: پارتی دیموكراتی كوردستان هەر لەسەرەتاوە دژایەتی خۆی بۆ بەڕێوەچوونی هەڵبژاردن دەربڕیوە، بۆ ئەوەش كۆمەڵێك پاساوی نابەجێی دەهێنایەوە كە هیچ كام لەو پاساوانە لەجێی خی نەبوون، بەڵام لەڕاستیدا داواكاری پارتی بۆ دواخستنی هەڵبژاردن ترسانی ئەو حزبە بوو لە دەرئەنجامەكانی هەڵبژاردن بەوەی كە دەنگەكانی كەمدەكات و بواری ساختەكاری كەمدبێتەوە بۆ زیادكردنی دەنگەكانی.
ئاماژەی بەوەشكرد، دژایەتی كردنی هەڵبژاردنی پەرلەمانی كوردستان دژایەتی كردنی خواستی شەقام و زۆربەی خەڵكی كوردستان و قەوارەی هەرێمی كوردستان بوو، لەگەڵ ئەوەشدا پارتی پێشتر لەرێگەی لیستی كەسانی مردوو دووبارە دیزاینی پێشوەختەی بۆ ئەنجامی هەڵبژاردنی دەكرد كە لەبەرژەوەندی خۆیدابوو.
ئەو ئەندامەی ئەنجومەنی سەركردایەتی یەكێتی نشتیمانی كوردستان ئەوەشی خستەڕوو، ئێمە هەر لەسەرەتاوە خوازیاری ئەنجامدانی هەڵبژاردن بووین، هەمیشە ساز و ئامادەین بۆئەنجامدانی هەڵبژاردنیش و هیچ خواستێكمان بۆ دواخستنی هەڵبژاردن نیە و نەبووە، چونكە ئەوە خواستی هاوڵاتیانی هەرێمی كوردستانە كە هەڵبژاردن بكرێت و هەرێمی كوردستان پێویستی بە چاكسازیی هەیە و چەندین ساڵە هاوڵاتیانی هەرێمی كوردستان بەدەست ئەو زۆرینە دەستكردە موزەیەفەوە دەناڵێنێت كە پارتی دیموكراتی كوردستان لە پەرلەمانی كوردستان دروستی كردبوو.
