SNNوردەكاری ژمارەی كاندید و سەرۆك لیستەكانی یەكێتی بۆ هەڵبژاردنی پەرلەمانی كوردستان بڵاودەكاتەوە

SNN-عەلی حەمە سەعید

دوای ئەوەی كۆمیسیۆنی باڵای سەربەخۆی هەڵبژاردنەكان كۆتایی بەو وادەیە هێنا كە بۆ لایەنە سیاسییەكانی دیاریكردبوو بۆ تۆماركردنی ناوی بەربژێرەكانیان، یەكێتی نشتیمانی كوردستان بۆ هەڵبژاردنی خولی شەشەمی پەرلەمانی كوردستان 172 كاندیدی دیاركردووە بۆ ئەوەی لە پرۆسەی دەنگدان بەشداری بكەن، هاوكات زۆرترین كاندیدی لە بازنەی سلێمانییە كە 72 كاندیدە و رێژەی 30% زیاتری كاندیدەكانی ژنن.

بەگوێرەی ئەو داتایانەی كە لە مەكتەبی هەڵبژاردنەكانی یەكێتی نشتیمانی كوردستان بە SNNدراون ئەوەخراوەتەروو، بۆ هەرچوار بازنەی هەڵبژاردن لە سلێمانی و هەولێر و هەڵەبجە و دهۆك، یەكێتی نشتیمانی كوردستان  172 كاندیدی بۆ 100 كورسی پەرلەمان دیاركردووە لەو ژمارەیە 72 كاندیدیان لە بازنەی سلێمانی و 64 كاندیدیشیان لە بازنەی هەولێر و 30 كاندیدیشی لە بازنەی دهۆكە و بازنەی هەڵەبجەش شەش كاندیدی هەیە.

ئاماژە بەوەشكراوە، بەگوێرەی یاسای كۆمیسیۆن هەر لایەنێكی سیاسی دەتوانێت دوو هێندەی ژمارەی كورسییەكان كاندید دیاری بكات، بۆیە یەكێتیش بۆ هەر بازنەیەكی هەڵبژاردن بەو یاسایە كاری كردووە، هەر بازنەیەكیش سەرۆك لیستی خۆی هەیەو بۆ بازنەی (هەولێر شاڵاو كۆسرەت) بۆ بازنەی سلێمانی( د. میران محەمەد) و بۆ بازنەی دهۆكیش (عەلی ئۆرەماری) و بۆ بازنەی پارێزگای هەڵەبجەش (بەرزان عوسمان) كراون بە سەرۆكی لیستی یەكێتی.

هەر لەو داتایانەی كە لەمەكتەبی هەڵبژاردنەكانی یەكێتی بە SNNدراون ئەوەشخراوەتەڕوو، رێژەی كاندیدكردنی ژنان لە لیستەكانی یەكێتیی نیشتمانیی كوردستاندا رێژەكەی لە 30% زیاترە و لەكۆی ژمارەی كاندیدەكانی 63 كاندیدی ژنە، بەشێوەیەك لەبازنەی هەولێر 24 كاندید و لە بازنەی سلێمانی 26 كاندیدو لەدهۆك 10 كاندید و لە پارێزگای هەڵەبجە 3 كاندیدی ژن هەن.