دوای 43 ساڵ لە زیندانیکردن، بەبێ تاوان ئازاد کرا
زیندانی بێ تاوان
SNN
ژنێکی ئەمریکی کە ماوەی 43 ساڵ بە تاوانی کوشتنێک کە ئەنجامی نەداوە لە زیندان بوو، دوای هەڵوەشاندنەوەی سزاکەی ئازاد کرا.
ساندرا هێمی تەمەن 64 ساڵ درێژترین ماوەی زیندانیکردن لە مێژووی ئەمریکادا بەسەر بردووە، ساندرا بە تۆمەتی کوشتنی کارمەندێکی کتێبخانە لە شارێکی ویلایەتی میزۆری، سزای زیندانی هەتاهەتایی بەسەردا سەپێندرا.
لێکۆڵینەوەکانی دۆسیەکەی دەریخست کە هیچ بەڵگەیەک بۆ ئەوە نەبووە کە ئەو تاوانەکەی کردبێت، جگە لە دانپێدانانەکەی خۆی نەبێت، بەپێی بەڵگەنامەکانی دۆسیەکە، بەدواداچوونەکانی پۆلیس لە کاتێکدا دانپێدانانی ژنەکەیان دەستکەوتووە کە ناوبراو لە نەخۆشخانەیەکی دەروونی خەوێندرابوو و کاریگەرییەکی زۆری لەسەر ئەو دەرمانانە بووە کە پێی دراوە.
