“له زۆرینه‌ى رووبه‌رى هه‌ولێردا گازى میسان زیاتره له ستانداردى جیهانى”
نمونه‌یه‌كى وه‌رگیراو له بڵاوبوونه‌وه‌ى گازى میسان له هه‌ولێر | فۆتۆ: هێدى جه‌مال
SNN
ئه‌نجامى توێژینه‌وه‌یه‌كى نوێ ده‌ریده‌خات له زۆرینه‌ى ناوچه‌كانى هه‌ولێر گازى میسان له سه‌روو رێژه‌ى ستاندارده‌وه‌یه و ئه‌مه‌ش مه‌ترسى له‌سه‌ر ژیان و ته‌ندروستى هاووڵاتیان دروستكردووه.
هێدى جه‌مال، توێژه‌ر له زانكۆى توێنتێ له هۆڵه‌ندا توێژینه‌وه‌یه‌كى نوێى له‌سه‌ر پیسبوونى هه‌واى شارى هه‌ولێر كردووه، هه‌رچه‌نده هێشتا توێژینه‌وه‌كه کۆتایی نەهاتووە، به‌ڵام ئه‌و توێژه‌ره له هه‌ژمارى تایبه‌تى خۆى له تۆڕى كۆمه‌ڵایه‌تى فه‌یسبووك به‌شێك له ئه‌نجامه‌كه‌ى بڵاوكردووه‌ته‌وه و ده‌ڵێت: “بەگشتی دەتوانین بڵێن رووبەرێکی زۆری شارەکە کەوتۆتە نێو هەرێمی (گەرم ) مەبەستمان لە هەرێمی گەرم ئەو شوێنانەن کە ئاستی گازی میسان تیایاندا بەرزترە لە ستانداردی رێگەپێدراو”.
