کۆمیسیۆن شوێنگرەوەی كورسییەكەی (ڕێبوار تەها)ی لە ئەنجومەنی پارێزگای كەركوك پەسەندكرد

SNN-عەلی حەمە سەعید

ئەمڕۆ چوار شەممە كۆمیسیۆنی باڵای سەر بەخۆی هەڵبژاردنەكانی عێراق بە فەرمی شوێنگرەوەی ( ڕێبوار تەها) پارێزگاری نوێی كەركوكی لە ئەنجومەنی پارێزگای كەركوك پەسەند كرد، كە ( عەبدوڵڵا میروەیس) لەهەمان لیستی كەركوك هێزو ئیرادەمانە جێگەی دەگرێتەوە.

جومانە غەلای، وتەبێژی كۆمیسیۆنی باڵای سەر بەخۆی هەڵبژاردنەكانی عێراق بە SNNی ڕاگەیاند: ئەنجومەنی كۆمیسیارانی سەر بە كۆمیسیۆن ئەمڕۆ چوارشەممە ئەو نوسراوانەیان پەسەند كرد كە لەلایەن فەرمانگەی یاسایی و زانیاری و تەكنەلۆجیا لەبارەی جێگرەوەی ( ڕێبوار تەها) ئاراستەی كرابوون.

ئاماژەی بەوەشكرد، بەگوێرەی نوسراوەكان و هەروەها بەگوێرەی ڕیزەبەندی زۆرترین دەنگی بەدەستهاتوو لە لیستی كەركوك هێزوئیرادەمانە (عەبدوڵڵا میروەیس شێخانی) كاندیدی ژمار 9 لەو لیستە لە ئەنجومەنی پارێزگای كەركوك شوێنی(رێبوار تەها) دگرێتەوە.

لەكۆبوونەوەی رۆژی 10/8/2024 ئەنجومەنی پارێزگای كەركوك كە لەبەغدا بەڕێوەچوو، تێیدا رێبوار تەها وەك پارێزگاری كەركوك لەپشكی كورد هەڵبژێردراو هەروەها محەمەد حافز لەپشكی عەرەب بە سەرۆكی ئەنجومەنی پارێزگای كەركوك هەڵبژێردرا.