نوێترین زانیاری لەبارەی پێدانی زەوی بە فەرمانبەران لە سنوری پارێزگای سلێمانی
دابەشکردنی زەوی
SNN-عەلی حەمە سەعید
بەڕێوەبەری راگەیاندنی سەرۆكایەتی شارەوانی سلێمانی ئاماژە بەوەدەكات هەنگاوەكان بۆ تەرخانكردنی زەوی بەمەبەستی پێدانی بە فەرمانبەران بەردەوامن و لیژنەیەك لە شارەوانی پێكهێنراوە بەمەبەستی یەكلاكردنەوەی زەوییەكان
زەردەشت رەفیق، بەڕێوەبەری راگەیاندنی سەرۆكایەتی شارەوانی سلێمانی بە SNNی ڕاگەیاند: لیژنە تایبەتمەندیەكانی تایبەت بە تەرخانكردنی زەوی بۆ فەرمانبەران بەردەوامن لەكارەكانیان، ئەوەی پەیوەندی بە سەرۆكایەتی شارەوانی سلێمانییەوە هەیە ئەوەیە كە بتوانین زەوی پێویست بۆ سەرجەم ئەو فەرمانبەر و خانەنیشنانە تەرخان بكەین كە سودمەند دەبن لە بریاری وەرگرتنی زەوی.
ئاماژەی بەوەشكرد،لەم قۆناغەدا كاری سەرۆكایەتیی شارەوانیی سلێمانی لە پێدانی زەوی بە فەرمانبەران، ئەوەیە بتوانێت زەوییەكان ئیفراز بكرێن و بیانكاتە سەر شارەوانی و دواتر بەسەر فەرمانبەراندا دابەشبكرێت، بۆ ئەومەبەستەش لیژنەیەك لە شارەوانیی سلێمانی پێكهێنراوە بەمەبەستی یەكلاكردنەوەی ئەو زەوییانە.
بەڕێوەبەری راگەیاندنی سەرۆكایەتی شارەوانی سلێمانی ئەوەشی خستووەتەڕوو، لەئێستادا لیژنەكانی شارەوانی لە كارەكانیان بەردەوامن، بەڵام نازانین كەی كۆتایی بەكارەكانیان دێت و زەوی پێویست ئیفراز دەكرێت بۆ دابەشكردن، بەڵام ئەوەی لە توانایاندا بێت بۆ ئەو مەبەستە كەمتەرخەمیی ناكەن.
