دەستەی ژینگە سکاڵای لەسەر بکوژانی ورچەکەی باڵاکایەتی تۆمارکرد

SNN

دەستەی ژینگەی هەرێم سکاڵای یاسایی دژی ئەو کەسانە بەرزکردووەتەوە کە ورچەکەی باڵەکایەتیان کوشتووە، لە بەرامبەریشدا وەک پێبژاردن داوای 20 ملیۆن دینار دەکەن.

ئەمڕۆ دووشەممە 30ی ئەیلوول، دەستەی پاراستن و چاککردنی ژینگەی هەرێم ڕایگەیاند، نوێنەری یاسایی فەرمانگەی ژینگەی هەولێر بەهەماهەنگی لەگەڵ فەرمانگەی ژینگەی سۆران لە دادگای لێکۆڵینەوەی چۆمان ئامادەبوون بەمەبەستی تۆمارکردنی سکاڵای یاسایی لەدژی کەسانێکی نەناسراو  کە هەڵسابوون بەکوشتنی ( ورچێکی کێوی ) لەسنوری گوندی (وێزێ) سەربەقەزای چۆمان.

ئاماژە بەوەکراوە، کوشتنی ورچەکە بەپێی ڕێنمایی نوێی ژمارە (1ی ساڵی 2023)ی تایبەت بە ڕێکخستنی ڕاوکردن بە تاوانی ژینگەیی دادەنرێت و داوای بڕی 20 ملیۆن دینار پێبژاردن کراوە.

کۆتایی مانگی حوزەیرانی ڕابردوو وێنەی ورچێک بڵاوکرایەوە کە لەلایەن کەسانی نەناسراوەوە لە سنووری قەزای چۆمان کوژرا، ئەوەش ناڕەزایی زۆری ژینگەپارێزان و داکۆکیکارانی پاراستنی مافی ئاژەڵانی لێکەوتەوە و داوایان لەلایەنی بەرپرسکرد دەستبەجێ ئەو کەسانە دەستگیربکەن کە هۆکاری کوشتنی ورچەکە بوون، چونکە بەو کارەیان سروشتی ژینگەی ناوچەکەیان شێواندووە.