“لەهەوڵی پابەندكردنی سەرۆكوەزیرانی عێراقین بە بڕیارەكەی دادگای فیدراڵی لەبارەی تەوتین”
SNN-عەلی حەمە سەعید
ئەندامێكی فراكسیۆنی یەكێتی ئاماژە بەوەدەكات دەستیان بە كۆكردنەوەی ئیمزاكردووە لە پەرلەمانی عێراق بۆئەوەی بەبانكیكردنی موچەی موچەخۆرانی هەرێم تەواو بكرێت و سەرۆك وەزیرانی عیراق پابەند بكرێت بە جێبەجێكردنی بڕیارەكەی دادگای فیدراڵی لەبارەی تەوتینی مووچەی فەرمانبەران لە بانكە فیدراڵییەكان.
كاروان یاروەیس، ئەندامی پەرلەمانی عێراق لە فراكسیۆنی یەكێتی بە SNNی ڕایگەیاند: لەدرێژەی هەوڵەكانمان بۆ جێبەجێكردنی بڕیارەكەی دادگای فیدراڵی لەبارەی تەوتینی مووچەی فەرمانبەرانی هەرێم دەستمانكردووە بە كۆكردنەوەی واژۆ تا ئێستاش زیاد لە 102 پەرلەمانتار و سەرۆكی چوار فراكسیۆن ئیمزایان لەسەر یاداشتێك كردووە و ئاراستەی سەرۆكایەتی پەرلەمان كراوە بۆ ئەوەی سەرۆك وەزیرانی عێراق پابەند بكات بە جێبەجێكردنی بڕیاری دادگای فیدراڵی كە تایبەتە بە تەوتینكردنی موچەی موچەخۆرانی هەرێم.
ئاماژەی بەوەشكردووە، هەڵمەتەكە ڕەنگدانەوەی خواستی موچەخۆرانی هەرێمە و جێبەجێكردنی بڕیاری دادگای فیدراڵییە كە بڕیارەكانی تانەی لێنادرێت و دەبێت وەك خۆی جێبەجێ بكرێت.
ئەو پەرلەمانتارەی فراكسیۆنی یەكێتی ئەوەشی خستووەتەڕوو، جگە لە پەرلەمانتارانی پارتی هەریەكەلە سەرۆكی فراكسیۆنی یەكگرتووی ئیسلامی و نەوەی نوێ و كۆمەڵی دادگەری و ئەندامەكانیان و بەشێك لە پەرلەمانتارانی عێراق واژۆیان لەسەر ئەو نوسراوە كردووە.
