وتەبێژی كۆمیسیۆن: لایەنەكان سێ ڕۆژیان لەبەردەمدایە بۆتانەدان لە ئەنجامی كۆتایی هەڵبژاردن

SNN-عەلی حەمە سەعید

وتەبێژی كۆمیسیۆنی بالای سەر بەخۆی هەڵبژاردنەكان ئاماژە بەوەدەكات سبەی چوار شەممە لە كۆنگرەیەكی ڕۆژنامەوانیدا ئەنجامی كۆتایی هەڵبژاردنی خولی شەشەمی پەرلەمانی كوردستان ڕادەگەیەنین و بەگوێرەی یاساش لایەنە سیاسییەكان و بەربژێرەكان ماوەی سێ‌ ڕۆژیان لەبەردەم دەبێت بۆ تانەدان لە ئەنجامەكان.

جومانە غەلای، وتەبێژی كۆمیسیۆنی باڵای سەربەخۆی هەڵبژاردنەكانی عێراق بە SNNی ڕاگەیاند: سبەی چوار شەممە لە كاتژمێر 10ی پێش نیوەڕۆ لە كۆنگرەیەكی ڕۆژنامەوانیدا لە شاری بەغدا ئەنجامی كۆتایی هەڵبژاردنەكانی خولی شەشەمی پەرلەمانی كوردستان ڕادەگەیەین، بەپێی یاسا، دوای راگەیاندنی ئەنجامی كۆتایی هەڵبژاردن، حیزبەكان و بەربژێرەكان سێ رۆژیان بۆ تانەدان لە ئەنجامی هەڵبژاردنەكە هەیە.

ئاماژەی بەوەشكرد، لە رۆژی پێنجشەممە، 31/10  دەست بە وەرگرتنی تانەكان دەكرێت و تا ڕۆژی 3/11/ وەرگرتنی تانەكان بەردەوامی دەبێت هاوكات رۆژی هەیینیش نووسینگەكانی كۆمیسیۆن بۆ وەرگرتنی تانەكان كراوە دەبن.

وتەبێژەكەی كۆمیسیۆنی بالای سەربەخۆی هەڵبژاردنەكانی عێراق ئەوەشی خستەڕوو، ئەو كەس و لایەنانەی ناڕازین دەتوانن سكاڵا تۆماربكەن و دەستەی دادوەریی هەڵبژاردنەكانیش لە 10 رۆژدا تانەكان یەكلایی دەكاتەوە.