بەڕێوەبەری باخچەكانی سلێمانی: پلانمان هەیەڕێژەی سەوزایی لە ئاستی ستانداردی جیهانی تێپەڕێنین

SNN-عەلی حەمە سەعید

بەڕێوەبەری باخچەكانی سلێمانی ئاماژە بەوەدەكات، لە ئێستادا ڕێژەی سەوزایی لە سلێمانی زیاترە لە %19 ئەوەش بەهۆی گرنگیپێدانەوەیە كە بە ژینگەی سلێمانی دەدرێت لە ناشتنی نەمام، هاوكات پلانیشمان هەیە ڕێژەی سەوزایی لە سلێمانی بگەیەنینە زیاتر لە ئاستی ستاندارد.

بەهرۆز سالار، بەڕێوەبەری باخچەكانی سلێمانی، بەSNNی ڕاگەیاند: لە چوارچێوەی ئەو گرنگیپێدانەی كە بە ڕێژەی سەوزایی دەدرێت لە سنوری پارێزگای سلێمانی، لە ئەمساڵدا تواندراوە بەهاوكاری هەمووئەو لایەنانەی كە پەرۆشی پاراستنی ژینگەی سلێمانین، هەزاران نەمام لە سلێمانی بڕوێندرێن و بۆ داهاتووش پلانی دیكەمان هەیە كە ڕێژەی سەوزایی ئاستی ستانداردی جیهانی تێپەڕێنێت.

ئاماژەی بەوەشكرد، لەئێستادا ڕێژەی سەوزایی لە سلێمانی لە ئاستێكی زۆر باشدایە و پێشەنگی زۆرینەی شارەكانی دیكەی عێراق و هەرێمی كوردستانە، هاوكات سلێمانی ئێستا لەڕووی ڕێژەی سەوزایی لە %19 زیاترە و لە هەوڵی زیاتركردنیداین.

بەڕێوەبەری باخچەكانی سلێمانی ئەوەشی خستەڕوو، ئەو نەمامانەی كە لە ساڵانی ڕابردوو ناشتومانە پێویستیان بەوەهەیە چاودێری بكرین و خزمەتبكرێن تا لە ترسی لەناوچوون دەردەچن، بەتایبەت لەڕووی ئاودانی نەمامەكانە و بۆ ئەو مەبەستەش سەرجەم تیمەكانی شارەوانی و بەڕێوەبەرایەتی باخچەكانی سلێمانی لە ئەركدان بۆ پاراستنیان.