لە سلێمانی هیچ پاڵاوگەیەكی نایاسایی بوونی نییە و لەهەولێر و دهۆكیش 153 پاڵاوگەی نایاسایی هەن
ئاسمانی هەولێر
SNN-عەلی حەمە سەعید
لەگەڵ ئەوەی ناوبەناو لەلایەن سەرۆكی حكومەتی هەرێم و پارێزگارەكانی هەولێر و دهۆك بڕیاری داخستنی پاڵاوگە نایاساییەكان دەردەچێت، بەڵام تاوەکو ئێستا ئەو بریارانە كاریان پێناكرێت و بە دەیان پاڵاوگەی نایاسایی بەردەوامن لەكاركردن، هاوكات لە سلێمانیش هیچ پاڵاوگەیەكی نایاسایی بوونی نییە.
سوبحان محەمەد، چالاكوانی بواری ژینگەیی بە SNNی ڕاگەیاند: بەگوێرەی ئەو بەدواداچوونانەی كە كە كردوومانە لە سنوری پارێزگای هەولێر 138 پاڵاوگەی نایاسایی بوونیان هەیە كە كار لە پاڵاوتنی نەوتی ڕەشدەكەن و هاوكات لە پارێزگای دهۆكیش بەهەمان شێوە 15 پاڵاوگەی نایاسایی هەن بەوجۆرە تەنها لەو دوو پارێزگایە 153 پاڵاوگەی نایاسایی تۆماركراون، بەڵام لە سلێمانی هیچ پاڵاوگەیەكی نایاسایی بوونی نییە و پارێزگاری سلێمانیش بۆ خۆی ئەوەی پشتڕاستكردووەتەوە.
ئاماژەی بەوەشكرد، لەگەڵ ئەوەی چەندین بڕیاری سەرۆكی حكومەت و پارێزگاری ئەو دوو شارە هەن بۆ ئەوەی دەستبەجێ ئەو پاڵاوگە نایاساییانە دابخرێن، بەڵام بەداخەوە تەنها ڕۆژێك كار بەو بڕیارانە دەكرێت یاخود هەر كاریشیان پێناكرێت، چونكە هەر بە گوێرەی بەدواداچوونەكانی ئێمە تاوەکو ئەمڕۆ 20/1/2025 نزیكەی40 پاڵاوگەی نایاسایی لە سنوری پارێزگای هەولێر بەردەوامن لەكاركردن و لە سنوری دهۆكیش بەهەمان شێوە شەش پاڵاوگە كاردەكەن.
ئەو چالاكوانەی بواری ژینگە ئەوەشی وت، لەلایەن بەرپرسانی دەستڕۆیشتووی ئەو سنورە كارئاسانی دەكرێت، بۆئەوەی بڕیارەكانی سەرۆكی حكومەت جێبەجێنەكرێن بەداخستنی ئەو پاڵاوگانە، ئەوەش بە بیانووی ئەوەی گوایە فلتەر بۆ پاڵاوگەكان دادەنرێت و مەرجی قورس بۆ كاركردن دادەندرێت، بەڵام ئەمانەش تەنها قسەن و هیچ كارێكی ئەو تۆیان لەگەڵ ناكرێت بەشێوەی ڕابردوو بەردەوامن لەكاركردن.
