ئەندامێكی سەركردایەتی یەكێتی: كەركوك و یەكێتی بەبێ یەكتری نایانكرێت
کەرکوک
SNN-عەلی حەمە سەعید
ئەندامێكی سەركردایەتی یەكێتی ئاماژە بەوەدەكات، سەردانەكەی سەرۆك بافڵ بۆ كەركوك و چوونە ناو جەماوەر لەناو كەركوك دەرخەری ئەو ڕاستیەیە كە یەكێتی و كەركوك بەبێ یەكتری نایانكرێت، هاوكات سەرۆكی یەكێتیش سەربەزانە سەردانی كەركوكی كردەوە.
لەتیف نێروەیی ئەندامی سەركردایەتی یەكێتی بە SNNی ڕاگەیاند: سەردانەكەی ئەم دواییەی ( بافڵ جەلال تاڵەبانی) سەرۆكی یەكێتی بۆ كەركوك و چوونە ناو جەماوەر و تێكەڵ بوونی ڕاستەوخۆ لەگەڵ هاوولاتیان، ئەو ڕاستییە دەسەلمێنێت كە یەكێتیی نیشتمانیی كوردستان و سەرۆكەكەی ناتوانن دوور بن لەیەكتری و بەبێ یەكتری نایانكرێت.
ئاماژەی بەوەشكرد، لە قۆناغەجیاوازەكاندا و لە بارودۆخە جیاوازەكانیدا، هەمیشە سەرۆكی یەكێتی و سەركردایەتی یەكێتی گرنگی زۆریان بە كەركوك داوە، چونكە كەركوكییەكانیش ئەوەیان سەلماندووە كە تەنها یەكێتی نشتیمانی كوردستانە لە خەمی ئەواندایە و لە ڕۆژە سەختەكاندا بەتەنها بەجێی نەهێشتوون.
ئەو ئەندامەی سەركردایەتی یەكێتی ئەوەشی خستەڕوو، یەكێتی نیشتمانیی كوردستان لەسەرەتای دامەزراندنیەوە هەتا ئێستا لە قۆناغ و وێستگە جیاوازەكاندا كەركوكی جێنەهێشتووە، وەك هێزێكی كوردستانی و عێراقی لە خەبات و تیكۆشان و خزمەتیشدا هێزی یەكەمی شارەكەیە، لەو رووەوە سەردانەكەی سەرۆك بافڵ بۆ كەركوك بۆ خەڵكی ئەم شارە جێی گرنگی خۆی هەیە.
