بەشێك لە خانەنشینان ئەمڕۆ سێ مووچە بەیەكەوە وەردەگرن

SNN-عەلی حەمە سەعید

وتەبێژی یەكێتی خانەنشینانی كوردستان ئاماژە بەوەدەكات ئەمڕۆ بەشێك لەو خانەنشینانەی كە لەسەرەتای ئەمساڵەوە بەهۆی یاسای خانەنشینی یەكگرتووی عێراق خانەنشین بوون، سێ‌ مووچە بەسەر یەكەوە وەردەگرن، جەختیش دەكاتەوە مانگی داهاتووش بەشێكی دیكەیان چوار مووچە پێكەوە وەردەگرن.

سادق عوسمان، وتەبێژی یەكێتی خانەنشینانی كوردستان بە SNNی ڕاگەیاند: دوای ئەوەی بەشێك لەو خانەنشینانەی كە بەهۆی جێبەجیكردنی یاسای خانەنشینی یەكگرتوو خانەنشین بوون مامەڵەكانیان تەواو بوو ئەمڕۆ سێ مووچەیان بۆ بەستراوە و هەر سێ مووچەكەوە بەیەكەوە وەردەگرن.

ئاماژەی بەوەشكرد، لە سنووری پارێزگای سلێمانی نزیكەی 11 هەزار خانەنشین هەن بەڵام ژمارەیەكی زۆر كەمی ئەم خانەنشینانە مامەڵەكانیان تەواو بووە كە نزیكەی 200 خانەنشینە، بەڵام بۆ مانگەكانی داهاتوو ژمارەكە زیاتر دەبێت و ئەوانەی كە لە مانگی داهاتوو مامەڵەكانیان تەواو دەبێت چوار مووچە بەسەریەكەوە وەردەگرن.

وتەبێژەكەی یەكێتی خانەنشینانی كوردستان ئەوەشی ڕوونكردەوە، وەرگرتنی 12 مووچە بەسەر یەكەوە بۆ ئەو خانەنشینانە لەلایەن وەزارەتی دارایی عێراقەوە جێبەجێدەكرێت و مامەڵەكانیان ڕەوانەی لایەنی پەیوەندیدار كراوە ئەو مووچانەشیان بۆ خەرجدەكرێت بەگوێرەی ڕێنماییەكانی یاسای خانەنشینی.