هەنگاوی پێویست بۆ پاراستنی شاخی گۆیژە لە مەترسی ئاگرکەوتنەوە دەگیرێتەبەر

SNN

بەچاودێری قوباد تاڵەبانی، جێگری سەرۆكی ئەنجومەنی وەزیرانی هەرێم، هەنگاوی پێویست بۆ بەردەوامیدان بە سەوزكردن و پاراستنی شاخی گۆیژە لەمەترسی ئاگركەوتنەوە دەگیرێتە بەر. 

لەڕاگەیەندراوێكی رێكخراوی گەشەپێدانی مەدەنیەت CDO هاتووە: “لە كۆبوونەوەیەكی فراواندا، بەئامادەبوونی د. هەڤاڵ ئەبوبەكر پارێزگاری سلێمانی و شاهۆ عوسمان جێگری پارێزگار و ئاوات محەمەد قائیمقامی سلێمانی و بەشێك لەبەڕێوەبەرانی فەرمانگە پەیوەندیدارەكان و رێكخراوەكان و كۆمپانیاكانی بەشدار لەكەمپینی سەوزكردنی شاخی گۆیژە، رێكخراوی گەشەپێدانی مەدەنیەت CDO پلانێكی تۆكمەی پێشكەشی نووسینگەی جێگری سەرۆكی ئەنجومەنی وەزیران كرد كەتایبەتە بەپاراستنی دارستانەكانی گۆیژە لەمەترسی ئاگركەوتنەوە و بەردەوامیدان بە سەوز كردنی”.

باس لەوەشکراوە: “پلانەكەی رێكخراوی CDO راسپاردەی پێویست و گرنگی لەخۆ گرتووە تا فەرمانگە پەیوەندیدارەكان بیگرنەبەر بۆ پاراستنی دارستانەكان و كەمكردنەوەی زیانەكانی لەئەگەری كەوتنەوەی ئاگردا بۆ كەمترین ئاست”.

ئەوەشخراوەتەڕوو: “بەگوێرەی پلانەكە، بۆردی پەیوەندییەكان پێكدێت بەبەشداری هەموو فەرمانگەكان بۆ بڕیاردان لەبارەی میكانیزمی پاراستنی بناری گۆیژە، سەرباری راهێنان و بەهێزكردن و بونیادنانی توانای ئەو تیمانەی ئامادەكاری دەكەن بۆ كۆنتڕۆڵكردنی هەر رووداوێكی ئاگركەوتنەوە بەمەبەستی پاراستنی شاخی گۆیژە”.