“ئێستا بەنداوی دوکان لە 23.5% ئاوی تێدایە”

SNN

سەبارەت بە دەنگۆی جیاواز لەسەر بەنداوی دوکان، كە دەوترێت ئەگەری وشکبوون یان نەمانی ئاو تێیدا، بەڕێوەبەری بەنداوەكە ئەو دەنگۆیانە ڕەتدەكاتەوە و دەڵێت: ڕۆژانە بەگوێرەی خشتەی بەردەستیان و هەبوونی ئاو لە بەنداوەکەدا، ئاو بەردەدەنەوە.

کۆچەر جەمال، بەڕێوەبەری بەنداوی دوکان دەڵێت: “ئەوانەی دەوترێت لەسەر بەنداوەکە بێ بنەمان، بەگوێرەی دۆخەکە ئاو لە بەنداوەکەدا هەیە.”

ڕاشیگەیاندووە، ڕۆژانە بەگوێرەی خشتەی بەردەستیان و هەبوونی ئاو لە بەنداوەکەدا، ئاو بەردەدەنەوە و بەردانەوەی ئاو نەوەستاوە.

ئاشكراشی كردووە، ئێستا بەنداوی دوکان لە 23.5% ئاوی تێدایە.

بەنداوی دووکان، گەورەترین بەنداوی هەرێمی کوردستانە و توانای گلدانەوەی 7 ملیار مەتر سێجا ئاوی هەیە، ئێستا ئاو لە زیاتر لە سێ بەشی بەنداوەکە دابەزیوە.