دەستەی ژینگە: هیچ تیشکدانەوەیەکی ئەتۆم لە هەرێمی کوردستان تۆمار نەکراوە
SNN-
دوای بۆردوومانی ناوەندە ئەتۆمییەکانی ئێران، وتەبێژی دەستەی ژینگە رایگەیاند، “هیچ تیشکدانەوەیەک لە هەرێمی کوردستان تۆمار نەکراوە.”
د. سەنعان عەبدوڵڵا، وتەبێژی دەستەی ژینگەی هەرێمی کوردستان، ئەمڕۆ رایگەیاند، “تاوەکو ئێستا لە ئامێری پشکنین و تۆمارکردنی پیسبوونی ژینگە بە تیشکدانەوە ئەتۆمییەکان، هیچ تیشکدانەوەیەک تۆمار نەکراوە.”
لە شارەکانی هەولێر، سلێمانی، دهۆک، رانیە و زاخۆ ئامێری پشکنینی پیسبوونی هەوا لە تیشکدانەوە ئەتۆمییەکان دانراون.
ئامێرەکانی پشکنینی تیشکدانەوەی ئەتۆم لە عێراق و هەرێمی کوردستان جێگیرکراون، لە یەک کاتدا و پێکەوە پشکنین بۆ هەوا دەکەن و لە هەبوونی تیشکی ئەتۆمیدا فەرمانگەکان ئاگادار دەکەنەوە.
زیانی تیشكدانەوەی ئەتۆم بەگوێرەی نزیکیی ناوچەکان کاریگەریی هەیە، کاریگەرییەکانی کوشندەن بۆ تەندروستیی مرۆڤ، ژینگە، خۆراک، خاک و ئاو.
بەرەبەیانی ئەمڕۆ، ئەمریکا لە رێگەی فرۆکەی جەنگییەوە بنکە ئەتۆمییەکانی فۆردۆ، نەتەنز و ئیسفەهانی لە ئێران کردە ئامانج.
