بارەگای خاتەمولئەنبیا: بە هەموو توانامانەوە ئاسایشی گەرووی هورزم دەپارێزین
SNN –
بارەگای ناوەندیی “خاتەمولئەنبیا” هۆشدارییەکی توند و کتوپڕی ئاراستەی هێزە بیانییەکان کرد و ڕایگەیاند، پاراستنی ئاسایشی گەرووی هورمز تەنها لەژێر دەسەڵاتی هێزە چەکدارەکانی ئێراندایە.
“هەر تێپەڕبوونێک دەبێت بە هەماهەنگی بێت”
بارەگای خاتەمولئەنبیا لە ڕاگەیەندراوێکدا جەختی لەوە کردووەتەوە: “چەندین جار ڕامانگەیاندووە کە ئاسایشی گەرووی هورمز لە دەستی هێزە چەکدارەکانی کۆماری ئیسلامیی ئێراندایە، هەر تێپەڕبوونێکی ئارام و کەشتیوانی لە هەر بارودۆخێکدا بێت، دەبێت بە هەماهەنگی لەگەڵ هێزە چەکدارەکانی ئێمە ئەنجام بدرێت.”
هۆشداریی هێرش بۆ سەر سوپای ئەمریکا
لە بەشێکی تری ڕاگەیەندراوەکەدا کە ئاراستەی هێزە نێودەوڵەتییەکان کراوە، هاتووە: “هۆشداری دەدەین کە هەر هێزێکی چەکداری بیانی، بەتایبەتی سوپای دەستدرێژکاری ئەمریکا، ئەگەر هەوڵی نزیکبوونەوە و چوونە ناو گەرووی هورمز بدات، ڕووبەڕووی هێرش دەبێتەوە.”
پەرەسەندنی گرژییەکان
ئەم لێدوانە لە کاتێکدایە کە ناوچەکە لە دۆخێکی هەستیاردایە و جموجۆڵە دەریاییەکان لە گەرووی هورمز بە توندی چاودێری دەکرێن. ئەم هەڕەشە ڕاستەوخۆیانەی ئێران دوای ئەوە دێت کە باس لە دروستکردنی ناوچەی ئەمنی لەلایەن ئەمریکاوە لە ناوچەکەدا دەکرێت.
