وەزیری نەوتی عێراق لەگەڵ سەرۆکی فراکسیۆنی یەکێتی کۆبووەوە

SNN

ئەمڕۆ دووشەممە، 2ی11ی 2025، هەرێم کەمال ئاغا، سەرۆکی فراکسیۆنی یەکێتیی نیشتمانیی کوردستان لە ئەنجومەنی نوێنەرانی عێراق، سەردانی باسم محەمەد خزەیر عەبادی، وەزیری نەوتی عێراقی کرد .

لە دیدارەکەدا، دەستخۆشی و سوپاسی تایبەت ئاراستەی وەزیری نەوت کرد لەبەرامبەر ڕەزامەندیدانی بۆ ناردنی نەوتی سپیی ماڵان بۆ هەرێمی کوردستان .
ئەم بڕیارەش دوای ئەوە هات کە فراکسیۆنی یەکێتی پێشنیاز و ڕاسپاردەی پێویستی بەرزکردەوە بۆ سەرۆکی ئەنجومەنی نوێنەرانی عێراق، کە لای خۆیەوە هاوکار بوو لە بەرزکردنەوەی ڕاسپاردەکان و بەدواداچوون و جەختکردنەوەی بەردەوام لەگەڵ سەرۆکی ئەنجومەنی وەزیران.

لەم چوارچێوەیەدا، وەزیری نەوتی عێراق دووپاتی کردەوە کە وەک هاوکاری و پشتیوانییەک بۆ هاووڵاتیانی هەرێمی کوردستان ئەم بڕە نەوتەیان ناردووە و لە هەوڵدا دەبن بۆ دابینکردن و ناردنی وەجبەی دیکەی نەوتی سپی و هەوڵەکانیان بەردەوام دەبێت, هەروەها نرخی بەرمێک نەوتی عێراق بە نرخی پالپشتیکراو بەسەر هاووڵاتیان دابەشدەکرێت واتا بۆ هەر بەرمیلێک 30 هەزار دینار دەبێت.

پەیوەست بە بارودۆخی پارێزگای کەرکووک و دوای ڕوودانی خۆپیشاندانەکانی دوێنێ شەو، بەڕێز وەزیری نەوت بەڵێنی دا کە کێشەی سووتەمەنی لە کەرکووک چارەسەر بکات، و ئاماژەی بەوە دا کە هەرچەندە پارێزگای کەرکووک وەک شارەکانی دیکەی عێراق پشکی خۆی وەردەگرێت، بەڵام بەڵێنی دا بە تایبەتی کێشەی دابینکردنی گاز بۆ پارێزگاکە چارەسەر بکات ، لێرەوە سوپاس و پێزانینی خۆمان ئاراستەی بەڕێزیان دەکەین بۆ بەدەمەوەهاتنی کێشەکانی هاووڵاتیان .