ئێران ئاوی زێی بچوکی بەتەواوەتی گرتەوە
زێی بچوک فۆتۆ محەمەد مستەفا
SNN- محەمەد مستەفا
ئەمڕۆ چوارشەممە 12ی ئاب، ئێران تەواوی بەشە ئاوی زێی بچوکی لە بەنداوی کۆڵەسەی سەردەشت گرتەوە .
ئەبوبەکر بایز، قایمقامی قەزای پشدەر بە SNN ی راگەیاند : ئەمڕۆ چوارشەممە وڵاتی ئێران لە بەنداوی کۆڵەسەی شاری سەردەشتی ڕۆژهەڵاتی کوردستان ئاوی زێی بچوکی گرتۆتەوە و ئاستی ئاوی زێیەکە لە سنووری قەزای پشدەر بە رێژەیەکی بەرچاو دابەزیووە.
وتیشی ” لە ئێستادا زێی بچوک هیچ بڕە ئاوێکی ئەوتۆی لە ڕۆژهەڵاتی کوردستانەوە ناڕژێتە ناوی، بەڵکو تەنیا هەندێك سەرچاوەی ئاوی ناوخۆی هەرێم لە سنووری ماوەت و شارباژێر دەرژێتە ناوی”
لای خۆشیەوە زانا عوسمان بەرپرسی پرۆژەی ئاوی خاس بە SNN ی راگەیاند : ئەمڕۆ بەهۆی گرتنەوەی ئاوی زێی بچوک کێشە بۆ پرۆژەی ئاوی خواردەوەی قەڵادزێ دروستبووە، بەڵام سبەی پێنجشەممە دەتوانرێت ئاو بەسەر گەڕەکەکانی قەڵادزێ دابەشبکرێت.
