ئێران بەشێک لە ئاوی زێی بچوکی بەرداوەتەوە

SNN- محەمەد مستەفا

ماوەی دوو رۆژە ئێران بەشێک لە ئاوی زێی بچوکی بەرداوەتەوە و بەو هۆیەشەوە ئاستی ئاوەکە 12 سانتیمەتر زیادی کردووە .

زانا عوسمان سەرپەرشتیاری پڕۆژەی ئاوی خاس لە قەڵادزێ بە SNN ی راگەیاند “ماوەی دوو رۆژە لە بەنداوی کۆڵەسەی شاری سەردەشتی رۆژهەڵاتی کوردستان بەشێک لە ئاوی زێی بچوک بەردراوەتەوە، بەڵام رێژەی بەردانەوەی ئاوەکە زۆر کەمە و پێشبینیدەکرا رێژەیەکی زیاتر ئاو بەر بدرێتەوە .

وتیشی: “لە ماوەی ئەو دوو رۆژەدا ئاستی ئاوی زێی بچوک لە سنووری قەزای پشدەر بە رێژەی 12 سانتیمەتر زیادی کردووە و پێشبینیشدەکرێت لە چەند رۆژی داهاتوو ئێران بڕێکی زیاتری ئاوی زێی بچوک بەر بداتەوە .”

باسی لەوەشکرد: بەردانەوەی ئاوی زێی بچوک بەو رێژەیە نەبووە کە کێشەی لێڵبوونی زۆر بۆ ئاوی خواردنەوەی قەڵادزێ دروستبکات، بۆیە لە ئێستادا پرۆسەی دابەشکردنی ئاوی خواردنەوەی قەڵادزێ بەشێوەی ئاسایی بەڕێوەدەچێت .