لەماوەی نۆ مانگی ڕابردوو نزیکەی 15هەزار هاووڵاتی کۆچییان کردووە بۆ دەرەوەی وڵات

SNNـ بڕیار محەمەد

بەپێی ئامارێکی پرۆژەی گەنج لەهەرێمی کوردستان لەماوەی نۆ مانگی رابردوو نزیکەی 15هەزار هاووڵاتی کۆچیانکردووە، گەنجێکی دهۆکی دەڵێت زۆرینەی گەنجان هاووڵاتییان بەهۆی بێکاری ڕوو لەدەرەوەی وڵات دەکەن.

سەعدوڵا بەرواری، هاووڵاتییەکی شاری دهۆک لەبارەی کۆچی هاووڵاتییان و گەنجانەوە دەڵێت: بەهۆیی خراپی ژیان و کەمی خزمەتگوزاری و نەبوونی هەلی کار هۆکاری سەرەکین بۆکۆچی گەنجان و هاووڵاتییان، بەتایبەتیش لەم چەند ساڵەی رابردوو زۆرینەی گەنجان بێکار بوون و رێژەی هەژاریش بەشێوەیەکی بەرچاو بەرز بۆتەوە.

وتیشی “پێویستە حکومەتی هەرێمی کوردستان بەرنامەیکی هەبێت بۆ ئەوەی سود لە ئەزموون و توانای گەنجان وەربگرێت، دەرفەتی کاریشیان بۆ بڕەخسێنێت”.

لای خۆشیەوە سۆران ڕەشید، بەرپرسی میدیایی پڕۆژەى کۆچبەر لە کوردستان بە SNN ی راگەیاند: بەپێی دواین ئامارەکان، لە سەرەتای ئەمساڵەوە تاوەکو سەرەتای مانگی ئەیلول، نزیکەى 14.500 هاووڵاتی هەرێم کۆچیان کردووە بەرەو دەرەوە وڵات.

وتیشی “هەروەها نزیکەى 27 کۆچبەری هەرێم یان مردوون یاخود بێسەروشوێن بوون، بەڵام ژمارەیەکی زۆر کەمیان توانیویانە بگەنە وڵاتانی ئەوروپا، واتە یۆنان و ئیتاڵیا”.

بەپێی بەدواداچوونێکی SNN لەو ژمارەی کە پڕۆژەى کۆچبەر لە کوردستان رایگەیاندووە زۆرینەی ئەوانەی کۆچیانکردووە لەسنووری پارێزگای دهۆکە دوای ئەوانیش هەولێر و دواتر سلێمانییە.