نوێترین زانیاری لەبارەی دابەشكردنی مووچە و ناردنی 320 ملیار دینارەكەی بەغدا

SNN-عەلی حەمە سەعید
ئەندامێكی لیژنەی دارایی لە پەرلەمانی عێراق رایده‌گه‌یه‌نێت: حكومەتی عێراقی دەستی بە دابەشكردنی مووچەی خانەنشینان كردووە و لەم هەفتەیەشدا دەستدەكات بە دابەشكردنی مووچەی وەزارەتەكانی دیكە دواتر 320 ملیارەكەش دەنێرێت.

شیروان میرزا، ئەندامی لیژنەی دارایی لە ئەنجوومەنی نوێنەرانی عێراق بە SNNی راگەیاند: “وەزارەتی دارایی عێراق پلانی تایبەت بەخۆی هەیە لە دابەشكردنی مووچە، نایەوێت لە پێشدا 320 ملیار دینارەكە بۆ هەرێم بنێرێت، بەڵام مووچەخۆرانی خۆی مووچەیان وەرنەگرتبێت، بۆیە لە ئێستادا هەموو هەوڵەكان بە ئاراستەی ئەوەن كە وەزارەتی دارایی عێراق لە زووترین كاتدا قەرزێكی ناوخۆیی بكات بۆ دابینكردنی سیولەی پێویست بۆ دابەشكردنی مووچە ئەگەریش زۆر نزیكە لەم هەفتەیەدا دەستبكرێت بە دابەشكردنی مووچەی وەزارەتەكان”.

وتیشى: “ئەگەر وەزارەتی دارایی سیولەی پێویستی لەبەردەستدا بێت لەماوەی دوو رۆژدا دەتوانێت مووچەی سەرجەم وەزارەتەكان دابەشبكات، پاشان 320 ملیار دینارەكە رەوانەی هەرێم دەنێرێت، چونكە ئەو قەرزەی كە وابڕیارە حكومەتی عێراق بیكات پشكی هەرێم، تەنیا ئەو 320 ملیارەیە كە بڕیارە بۆ مووچەی بنێرێت”.

لەلایەكی دیكەوە بەرپرسێكی سەربە وەزارەتی دارایی حكومەتی هەرێم ئەوەی بۆ SNN روونكردەوە، “وەزارەتی دارایی هەموو ئامادەكارییەكی كردووە بۆ دابەشكردنی مووچە بە لێبڕینی %18 بۆ ئەو مەبەستەش زیاتر لە 400 ملیار دیناری داهاتی ناوخۆ كۆكراوەتەوە و لە چاوەڕوانی گەیشتنی 320 ملیار دینارەكەی بەغدایە، چونكە وەزارەتی دارایی دەیەوێت بە یەك لیست مووچەی سەرجەم وەزارەتەكان رابگەیەنێت”.