پەروەردەی رۆژهەڵاتی سلێمانی لەبارەی دەستپێکردنەوەی خوێندن روونکردنەوە دەدات

SNN-عەلی حەمە سەعید

هەرچەندە وەزارەتی پەروەردە سبەی شەممە 10/10/2020 وەك یەكەم ڕۆژی كردنەوەی دەرگای ناوەندەكانی خوێندن دیاریكردووە، بەڵام بە وتەی بەڕێوەبەری پەروەردەی رۆژهەڵاتی سلێمانی، بەهۆی ئەوەی یەكێتی مامۆستایان و هەروەها كارمەندانی دیوانی بەڕێوەبەرایەتی گشتی پەروەردە بایكۆتی دەوامیان ڕاگەیاندووە بۆیە سبەی دەرگای ناوەندەكانی خوێندن بەڕووی خوێندكاراندا ناكرێنەوە.

عومەر ساڵح، بەڕێوەبەری پەروەردەی رۆژهەڵاتی سلێمانی بە  SNNی راگەیاند: لەگەڵ ئەوەی وەزارەتی پەروەردەی حكومەتی هەرێم ئەمڕۆ لە راگەیەندراوێكدا سبەی وەك دەستپێكی ساڵی نوێی خوێندن دیاریكردووە، بەڵام پێناچێت دەرگای ناوەندەكانی خوێندن لە سنووری پارێزگای سلێمانی بەڕووی قوتابیاندا بكرێتەوە.

ئاماژەی بەوەشكرد: هۆكاری نەكردنەوەی دەرگای ناوەندەكانی خوێندن بۆ چەند پاڵنەرێك دەگەڕێنەوە كە یەكێكیان پەیوەندی بەوەوە هەیە یەكێتی مامۆستایان بایكۆتی دەوامی راگەیاندووە و بەشێكی زۆری مامۆستایانیش پابەندن بەو بایكۆتەوە، هاوكات فەرمانبەران و كارمەندانی ناو دیوانی بەڕێوەبەرایەتی گشتی پەروەردەش بەهەمان شێوە بایكۆتی دەوامیان كردووە.

ناوبراو ئەوەشی خستەڕوو: راگەیاندنی بایكۆت لە لایەن یەكێتی مامۆستایان و فەرمانبەرانی ناو دیوانی بەڕێوەبەرایەتی گشتی پەروەردەی سلێمانی بۆ دابەشنەكردنی مووچە دەگەڕێتەوە كە لە ئێستادا نزیکەی 50 ڕۆژە مووچە دابەشنەكراوە و هیچ وادەیەكیش دیاری نەكراوە بۆ دابەشكردنی مووچە.